ՎԵՐԱԾՆՈՒՆԴ

Երկար ու դժվարին ճանապարհ անցնելուց հետո Խաչատրյանների ընտանիքում այսօր վերածնունդ է։ 44-օրյա պատերազմում միակ որդուն կորցնելուց հետո կրկին արու զավակ են ունեցել։

-Հոգեկան ապրումները ծանր էին, դրանց ուղեկցող առողջական խնդիրները նույնպես, բայց երեխա ունենալու որոշումը այլընտրանք չուներ,- ասում է հայրը՝ Մանուկ Խաչատրյանը։

Փոքրիկը օրեր առաջ է լույս աշխարհ եկել, բայց այս կարճ ժամանակում հասցրել է հիմնովին փոխել ընտանեկան մթնոլորտը՝ իր հետ բերելով ապրելու նոր հույս ու լույս։ Նորածինը մերօրյա հերոս Գառնիկ Խաչատրյանի կրտսեր եղբայրն է։ Նրան նույնպես Գառնիկ են անվանակոչել։

-Դիմագծերով շատ է նման ավագ եղբորը:

Գառնիկիս ծնունդով կյանքը մեր ընտանիքում վերաիմաստավորվեց, և սեփական փորձից ելնելով այժմ ավելի քան վստահ ենք՝ նորածին մանկան ճիչ պետք է լսվի յուրաքանչյուր որդեկորույս ընտանիքում,- ասաց մայրը՝ Հերմինե Մնացականյանը։

Խաչատրյանների ավագ որդին՝ Գառնիկ Խաչատրյանը, հետախույզ էր։ Նա հետմահու պարգևատրվել է «Մարտական ծառայության համար» մեդալով։

ՀՈՎՀԱՆՆԵՍ ՊԱՌԱՇՅԱՆ