ԻՍԼԱՄԱԲԱԴԸ ՌԱԶՄԱԿԱՆ ԳՈՐԾՈՂՈՒԹՅՈՒՆՆԵՐ Է ՍԿՍՈՒՄ ԹԱԼԻԲՆԵՐԻ ԴԵՄ
ԱՄՆ պաշտպանության նախարար Լեոն Պանետտան հայտարարել է, որ Պակիստանի բանակը պատրաստվում է լայնածավալ գործողություններ սկսել Աֆղանստանի հետ սահմանակից շրջաններում, որոնք ապաստան են դարձել «Ալ Քայիդայի հետ կապված «Խաքանիի ցանց» իսլամ ծայրահեղական կազմակերպության անդամների համար: Նա գործողության մանրամասները քննարկել է Պակիստանյան զինված ուժերի ղեկավար Աշֆակ Փարվեզ Կայանիի հետ:
Պանետտան չի հստակեցրել գործողության ժամկետները, այլ միայն նշել է, որ այն ուղղված է լինելու ոչ թե «Խաքանիի ցանցի», այլ բուն «Ալ Քայիդայի» դեմ:
Վաշինգտոնը երկար ժամանակ դժգոհություն էր հայտնում, որ Իսլամաբադը հրաժարվում է պայքարել աֆղան թալիբների ու նրանց դաշնակիցների դեմ, ովքեր Պակիստանի տարածքը հենակետ են դարձնում Աֆղանստանում ամերիկյան ու հյուսիսատլանտյան զորքերի դեմ հարձակումների համար:
Բազմաթիվ փորձագետների կարծիքով, Պակիստանն առանձնապես չի ձգտում հարվածներ հասցնել այս խմբավորումներին, որոնց հետ ունի պատմականորեն ձևավորված ամուր կապեր և որոնք կարող են Իսլամաբադի համար դաշնակիցներ դառնալ Աֆղանստանից ՆԱՏՕ-ի զորքերի հեռանալուց հետո:
Խորագիր՝ Նորություններ
