«ՌԱԶՄԱԳԻՏՈՒԹՅՈՒՆ» ԱՌԱՐԿԱՅԻ ԴԱՍԱՎԱՆԴՄԱՆ ՄԵԹՈԴԻԿԱՆ

Նախնական զինվորական պատրաստության ուսուցման եւ ռազմահայրենասիրական դաստիարակության խնդիրների հաջող կատարումը կախված է զինղեկի՝ դասը հմուտ կազմակերպելուց եւ մատուցելուց: Նա պարտավոր է տիրապետել ուսումնական աշխատանքների պլանավորման սկզբունքներին, ռազմական ուսուցման բարելավման եւ կրթական գործընթացի կազմակերպման ու սովորողների գիտելիքների գնահատման հարցերին: Զինղեկը պետք է պատասխանատվությամբ վերաբերվի, պատրաստվի դասին (պարապմունքին)՝ հաշվի առնելով «ռազմագիտություն» առարկայի առանձնահատկությունը:

ՆԶՊ ՊԼԱՆԱՎՈՐՈՒՄԸ

Պլանավորումը մանկավարժական աշխատանքների կազմակերպման կարեւորագույն սկզբունքներից է: Նախնական զինվորական պատրաստության պլանավորման հիմնական սկզբունքներն են`

-ուսուցման գործընթացի կազմակերպումը եւ ուսումնադաստիարակչական խնդիրների իրականացումը ՆԶՊ ուսումնական ծրագրի համապատասխան.

-յուրաքանչյուր դասի նախօրոք եւ մանրակրկիտ նախապատրաստում.

-մանկավարժական կոլեկտիվների հետ փոխգործակցության ապահովում.

– յուրաքանչյուր աշակերտի առաջադիմության վերահսկողություն` համաձայն ուսումնական ծրագրի:

Փորձը ցույց է տալիս, որ զինղեկին բաժին է հասնում զգալի թվով պլանավորման փաստաթղթերի մշակման աշխատանք: Առաջին խմբի մեջ են մտնում ժամահաշվարկը, շաբաթական պլանը, թեմատիկ հեռանկարային պլանը, դասավորման պլանը: Երկրորդ խմբի մեջ կարող են մտնել մյուս բոլոր ծրագրերը, որոնք կապված են ՆԶՊ առարկայի, ռազմահայրենասիրական կրթության աշխատանքների հետ: Պլանավորման հետ միասին, ուսումնական գործընթացի կարեւոր տարրերից համարվում է սովորողի կանոնավոր հաճախումը դասին, վարքը, մասնակցությունը գործնական պարապմունքներին:

Պլանավորումը եւ հաշվառումը բարդ եւ ժամանակատար աշխատանք է, որն էլ զինղեկից պահանջում է հմտություն եւ համապատասխան գիտելիքներ: Փորձը ցույց է տալիս նաեւ, որ առավել նպատակահարմար է փաստաթղթերը պլանավորել հետեւյալ հերթականությամբ.

1.Ժամահաշվարկ,

2.Շաբաթական պլան,

3.Դասացուցակ՝ շաբաթվա եւ գործնական պարապմունքների համար,

4.Թեմատիկ հեռանկարային պլան,

5.Պարապմունքի պլան,պլան հակիրճագիր:

ԺԱՄԱՀԱՇՎԱՐԿԸ բաղկացած է մի քանի փոխկապակցված աղյուսակներից: Առաջինը պարունակում է ուսումնական ժամերի բաշխումը կիսամյակի համար: Երկրորդը` կիսամյակային ուսումնական ժամերի քանակը առանձին բաժինների ուսումնասիրմամբ՝ կախված դասաժամերի քանակից, զինղեկի ծանրաբեռնվածությունից:

Ժամահաշվարկի համար անհրաժեշտ է քաղվածք ուսումնական պլանից, տեղեկություններ սովորողների կազմի, թվի մասին: Նպատակահարմար է ժամահաշվարկը կազմել մինչեւ շաբաթական պլանը նախապատրաստելը: Շաբաթական պլանը կազմվում է` հաշվի առնելով ներառարկայական եւ միջառարկայական առնչությունները, թեմաների անցկացման հերթականությունը:

ԴԱՍԱՑՈՒՑԱԿԸ ցույց է տալիս պարապմունքների քանակը ըստ շաբաթների` համաձայն ուսումնական պլանի: Զինղեկն ընդհանուր դասացուցակի քաղվածքի հիման վրա մշակում և կազմում է ՆԶՊ դասացուցակ շաբաթվա, ամսվա, կիսամյակի համար, որն էլ փակցվում է ՆԶՊ լսարանում:

ՀԵՌԱՆԿԱՐԱՅԻՆ ԹԵՄԱՏԻԿ ՊԼԱՆԸ, ի տարբերություն շաբաթականի, ընդգրկում է դասերի մանրամասն գրառումները, որոնք ներառում են յուրաքանչյուր դասի ուսումնադաստիարակչական նպատակը, մեթոդական բնութագիրը, ներառարկայական կապը, նյութական ապահովվածությունը եւ այլն: Հեռանկարային թեմատիկ պլանի կազմումը չի պահանջում յուրաքանչյուր դասի մանրամասն պլանավորում:

ԴԱՍԻ ՊԼԱՆԸ կազմելիս զինղեկը օգտագործում է հեռանկարային թեմատիկ պլանը, որից տվյալ դասի համար վերցնում է ուսումնա-դաստիարակչական ուղղվածությունը, ուսումնական հարցերը, դասի անցկացման մեթոդաբանությունը` նշելով անհրաժեշտ օժանդակ նյութերը եւ այլն:

Ի տարբերություն ընդհանուրի` անհատական պլանը մշակվում է այն միջոցառումների հաշվառմամբ, որոնք անցկացվում են ոչ դասարանային պարապմունքի ժամանակ:

Եզրափակելով` հարկ է նշել, որ զինղեկի մշակած պլանավորման փաստաթղթերը մեծ օգնություն են դպրոցներում անցկացվող ուսումնական աշխատանքներին: Մի կարեւոր գործընթաց, որի արդյունքում հաշվառվում եւ վերահսկվում է ուսումնա-դաստիարակչական աշխատանքների կազմակերպումը:

ՎԱՐԴԱՆ ՄԿՐՏՉՅԱՆ