ԲԱՇ ԱՊԱՐԱՆԻ ԵՎ ՍԱՐԴԱՐԱՊԱՏԻ ՀԵՐՈՍՆԵՐԻՆ

Դու՛ք, որ կանգնեցիք օրհասի պահին,

Կրծքով դիմահար հրին ու հողմին,

Ու բիբլիական հողը Նաիրյան

Ձեզ կորով տվեց և ուժ առնական:

Հնչեց ղողանջը զանգերի ուժգին,

Որպես ազդականչ, մարտակոչ ազգին

Հայկազյան ցեղից ելաք ընտրյալներ,

Վարդանանց շնչով դարձաք անվեհեր:

Համախմբվեցիք հավատքով դուք սուրբ,

Միաբանվեցիք մտքով ու բազկով

Միավորվեցիք խաչով ու սրով,

Ու հարատևման հավերժի կանչով:

Եվ անհավասար այդ գոյամարտում,

Անդուլ պայքարում բարու ու չարի

Միաբանության բռունցքն էր տոկում

Անձնազոհությամբ նվիրյալների:

Թո՛ղ, որ խորհուրդը հերոսամարտի,

Դառնա պատգամ այն վեհ հավատի,

Որ մոտ է ժամը, ու պիտի բացվի

Ժայռակերտ դուռն Ագռավաքարի:

Արմեն Հարությունյան
փոխգնդապետ