ԲԱՐՁՈՒՆՔԻՆ

Ինձ մի՛ փնտրեք

Հպարտ քայլերգով

Հաղթական կռվից

Դարձողների մեջ:

Եվ ոչ էլ փնտրեք

Քաջաբար ընկած

Հերոսների մեջ:

Ես տուն չդարձա,

Մնացի այնտեղ՝

Գոռ կռվի դաշտում,

Այն հերոսի հետ,

Որի սխրանքը

Ոչ ոք չտեսավ,

Որի աճյունը

Ոչ ոք չգտավ:

Եվ այդպես անհայտ

Ու անհիշատակ

Նա ընկած մնաց

Մռավի վրա՝

Բարձունքում անհաս…

ԻՄ ԵՐԳԸ

Կարո՞ղ ես երգել մի այնպիսի երգ,

Որ ուժ տա հողի անխոնջ մշակին,

Իր լուծը քաշող հոգնած եզներին:

Ուրեմն՝ երգի՛ր, երգի՛ր դու ուժգին:

Կարո՞ղ ես երգել մի այնպիսի երգ,

Որ ձայնդ հասնի հեռու աշխարհին,

Եվ տուն դարձնի թափառ պանդուխտին:

Ուրեմն՝ երգի՛ր, երգի՛ր դու ուժգին:

Եթե կարող ես, էլ մի՛ հապաղիր,

Զարկի՛ր թմբուկին,

Շեփորահարի՛ր…

Վ. ՄԻՍԱԿՅԱՆ

ենթասպա