ԵՐԴՄԱՆԸ ՀԱՎԱՏԱՐԻՄ

Օրերս գնդապետ Գ.Ենոքյանի հրամանատարությամբ գործող զորամասում երդման արարողություն էր: 100-ից ավելի նորակոչիկներ այդ օրը համալրեցին հայոց բանակի հաղթական շարքերը՝ ձեռք բերելով զենք կրելու, զենք կիրառելու իրավունք: Այսօր մենք ունենք այն ամենը, ինչը չենք ունեցել դարեր շարունակ: Ունենք բանակ՝ ի դեմս հայրենիքի պաշտպանի: Փառք ու պատիվ հայ զինվորին, ազգային բանակն ստեղծողներին, որոնց գործի շարունակողներն են լուսանկարներում պատկերված նորակոչիկները, ինչը եւ վկայեցին նրանք՝ հանդիսավոր երդմամբ: Աստված օգնական, որ հավատարիմ լինեն իրենց երդմանը:

Զորամասի հրամանատարը խրոխտ հայացքով հետեւում է նորակոչիկներին:

«Ինչպես երդվեցիր, այդպես էլ կծառայես»,- հորդորում է պատասխանատու սպան:

Նրանք երդվում են անձնվիրաբար ծառայել Հայրենիքին, անվերապահ կատարել կոչումով ավագների բոլոր հրամանները:

Ցանկացած մոր համար չկա ավելի հուզիչ, ավելի սրտառուչ պահ, քան տեսնել ու զանազանել սեփական որդուն հասակակիցների հոծ շարքերում:

Զինվորական երդմնակալությունից հետո նորակոչիկները որոտընդոստ շարքերով՝ դասակ առ դասակ անցնում են շարահրապարակով:

Ս. ՀԱՐՈՒԹՅՈՒՆՅԱՆ
Լուս.՝ Ա. ՎԱՐԴԱՆՅԱՆԻ