Հայ զինվոր

ՈՒՍՈՒՄՆԱԿԱՆ ՏԱՐՎԱ ՄԵԿՆԱՐԿԸ ՏՐՎԵՑ

Փետրվարի տասնյոթին ազգային բանակի զորամասերում սկսվեց նոր՝ 2014թ. ուսումնական տարին: Ինչպես միշտ, այս անգամ էլ գործընթացն սկսվեց շարային ստուգատեսով (զորամասերն այն հիմնականում անցկացրել էին նախորդ շաբաթվա վերջում) և հանդիսավոր արարողությամբ՝ միտինգով, որին հաջորդեցին եռօրյա մարտավարաշարային պարապմունքները: Ծավալուն ու մարտական պատրաստականության կարևոր մաս կազմող այս միջոցառումների անցկացումը վերահսկելու և զորամասերի հրամկազմերին տեղում գործնական օգնություն ցույց տալու համար պաշտպանության նախարարությունից և ԶՈՒ ԳՇ-ից զորամասեր էին մեկնել ղեկավարներ, հանձնաժողովներ:

Գեներալ-մայոր Իշխան Մաթեւոսյանի հրամանատարությամբ գործող զորամիավորումում հանդիսավոր արարողությանը մասնակցեց պաշտպանության նախարար Սեյրան Օհանյանը, իսկ օգնություն ցուցաբերող հանձնաժողովը գլխավորում էր գեներալ-մայոր Արիս Բրուտյանը:

Վաղ առավոտյան շարահրապարակում հանդիսավոր տողանի էին կանգնել զորամասերի անձնակազմերը: Զորամիավորման հրամանատար, գեներալ-մայոր Իշխան Մաթեւոսյանը նախարար Սեյրան Օհանյանին զեկուցեց անձնակազմերի՝ տոնական միտինգին շարված լինելու մասին: Ընդունելով զեկույցը՝ նախարար Ս. Օհանյանը զինծառայողներին ողջունեց եւ շնորհավորեց նոր ուսումնական տարվա մեկնարկի առթիվ: Ի պատասխան հնչեց հաղթական «հուռան»:

Զորամիավորման հրամանատարի ԱՀՏԱ գծով տեղակալ, գնդապետ Հ. Ավետյանը հանդիսավոր միտինգը հայտարարեց բացված:

Զորամիավորման կազմում գործող զորամասերին բեղմնավոր ուսումնական գործընթաց, խաղաղ ստեղծագործական աշխատանք մաղթեց գեներալ-մայոր Իշխան Մաթեւոսյանը: Նա սպաներին, ենթասպաներին, զինվորներին կոչ արեց ջանք ու եռանդ չխնայել եւ ամենակարճ ժամանակում անձնակազմերը բերել մարտական պատրաստականության պատշաճ աստիճանի:

Ելույթներ ունենալով՝ զինծառայողներին շնորհավորեցին եւ հաջողություններ մաղթեցին գնդապետներ Ա. Տոնոյանը, Հ. Սեւոյանը, հրետանային դիվիզիոնի զինվոր, շարքային Ն. Թունյանը:

Ամփոփիչ խոսքով հանդես եկավ նախարար Սեյրան Օհանյանը: Նա զինծառայողների, հրամանատարական կազմերի համար պարզաբանեց ուսումնական տարվա առանձնահատկությունները, ուսման որակի բարձրացման անհրաժեշտությունը եւ տվեց հանձնարարականներ, որոնց կիրառման դեպքում հնարավոր է ունենալ իրական առաջընթաց:

Միտինգն ավարտվեց անձնակազմերի հանդիսավոր երթով: Այնուհետեւ նախարար Սեյրան Օհանյանը եղավ զորամասերում, ծանոթացավ առանձին ծառայությունների պայմաններին: Նա հետաքրքրությամբ դիտեց գնդապետ Ա. Տոնոյանի զորամասի կապիտան Ստեփան Ալեքսանյանի վաշտում գաղափարադաստիարակչության ուղղությամբ կատարված ձեւավորումները եւ դրվատեց երիտասարդ սպային:

♦♦♦

Վերադառնալով զորանոցներ՝ ստորաբաժանումներն սկսեցին պարապմունքները ջոկ-դասակ կազմերով: Կապիտան Ս. Ալեքսանյանի վաշտում, թիվ 1 ուսումնական կետում՝ անձնակազմի գործողությունները տագնապով վերկացի ժամանակ, ննջարանում՝ հերթապահ սերժանտ Գեւորգ Բաղդասարյանի հայտարարած «տագնապ»-ից հետո, զինվորներն արագորեն հագնվեցին, անկողինները բերեցին տարհանման վիճակի եւ շարքով առաջացան դեպի թիվ 2 ուսումնական կետ. անձնակազմի գործողությունները տագնապով վերկացի ժամանակ՝ զինանոցում եւ հաջորդ ուսումնական կետում, պահեստում: Արագության համար այս գործողությունները կատարվեցին միաժամանակ: Զենք-զինամթերք ստացողները գնացին պահեստ` ստանալու ուսապարկերը, իսկ սկզբում պահեստ գնացածները եկան զինանոց: Հաջորդ՝ չորրորդ ուսումնական կետում, որը կոչվում է անձնակազմի գործողությունները վերակարգում, կապի միջոցով վերադաս հրամանատարությունից ճշտվում են հետագա անելիքները, իսկ սպառազինված դասակները զորանոցից վազքով դուրս գալով շարք են կազմում եւ սպասում հաջորդ հրամանին: Այս ամենը դասակները մեր ներկայությամբ կրկնեցին երկու անգամ: Կատարման որակը մասնագիտորեն ճշտելու համար դիմեցինք վերահսկող-օգնող հանձնաժողովի անդամ, փոխգնդապետ Հրաչ Օհանյանին.

-Հենց այսպես էլ պետք է լինի, կարեւորն էլ այն է, որ կա գործողությունների հստակություն եւ արագություն, իսկ աննշան թերությունները այսօրվա եւ վաղվա ընթացքում իսպառ կվերացվեն,- ասաց փոխգնդապետը: