ՇՆՈՐՀԱԿԱԼ ԵՆՔ

Վերջերս ենք վերադարձել ՀՀ ՊՆ «Լեռնային Հայաստան» առողջարանից, որտեղ հանգստանում էինք որպես Արցախյան պատերազմում զոհվածների հարազատներ: Անչափ տպավորված ենք առողջարանի անձնակազմի ջերմ վերաբերմունքից, ասես հարազատ մարդկանցով շրջապատված լինեինք:

Նախկինում մեզնից ոմանք առողջարանում եղել էին աշնանային-ձմեռային ամիսներին, սակայն այս անգամ շնորհիվ ՀՀ ՊՆ զինծառայողների սոցիալական պաշտպանության վարչության պետ, գնդապետ Սերժ Առուշանյանի, մենք դիլիջանյան շքեղ բնապատկերները վայելեցինք նաեւ ամռանը ու լիովին կազդուրված տուն վերադարձանք:

Ամեն մարդ իր գործն է անում, բայց շատ կարեւոր է՝ ինչպես: Սրտացավ եւ հոգատար վերաբերմունքի, անկեղծ լինենք, մեր այս հոգսաշատ, մեր այս դժվարին օրերում այնքան էլ հաճախ չենք հանդիպում: Հատկապես մեզ համար՝ Արցախյան պատերազմի ժամանակ զավակ, ամուսին, եղբայր ու քույր կորցրած մարդկանց համար այնքան կարեւոր ու անհրաժեշտ է մարդկային պարզհոգի, ջերմ վերաբերմունքը:

Շնորհակալ ենք ՀՀ ՊՆ ԶՍՊ վարչության պետ, գնդապետ Սերժ Առուշանյանին, «Լեռնային Հայաստան» առողջարանի ողջ անձնակազմին, բոլոր նրանց, ովքեր իրենց մարդկային ուշադրությամբ ինչ-որ կերպ մեղմում, ամոքում են մեր վիշտն ու ցավը:

Հարգանքներով՝ Լաուրա Մելքումյան,

Էվելինա Ներսիսյան, Աշխեն Պետրոսյան