ՀԱՅԵՑԻ ԴԱՍՏԻԱՐԱԿՈՒԹՅԱՆ ԵՎՍ ՄԻ ԿԵՆՏՐՈՆ

ՀՀ ՊՆ Վ. Սարգսյանի անվան ռազմական ինստիտուտում ՀՀ Սահմանադրության օրվան նվիրված ուշագրավ միջոցառումների շարքում հասարակագիտական առարկաների և լեզուների ամբիոնում բացվեց հայոց լեզվի մասնագիտական լսարանը: Ինստիտուտում գործող անգլերեն, ռուսերեն, գերմաներեն, պարսկերեն, հունարեն, ֆրանսերեն լեզուների լսարաններից այն առանձնանում է իր ինքնատիպությամբ, ուրույն ձևավորմամբ ու ասելիքով:

Լսարանը պատկերազարդող վահանակներում ներկայացված է հայոց լեզվի ծագման, տարածման գրեթե ողջ պատմությունը: Հայոց լեզուն արժևորում ու ներկայացնում են ոչ միայն հայ, այլև օտարազգի լեզվաբաններն ու գիտնականները:

Ծանոթությունը սկսվում է հայոց այբուբենի ու հնդեվրոպական լեզվաընտանիքի տոհմածառը պատկերող վահանակներից, որոնց միջոցով ներկայացվում են հնդեվրոպական լեզվի, հնագույն հնդեվրոպացիների (արիացիների) տրոհման, տարածքային սփռման գծապատկերը և հնդեվրոպական լեզվի խոսվածքների ձևավորումը ըստ ռուս և վրացի ակադեմիկոսներ Վյաչեսլավ Իվանովի և Թամազ Գամկրելիձեի:

Գեղեցիկ ու ճաշակով է ձևավորված «Ճանաչել զիմաստություն և զխրատ, իմանալ զբանս հանճարոյ» վահանակը, որը նվիրված է հայ գրերի ստեղծող, առաջին թարգմանիչ Մեսրոպ Մաշտոցի կյանքին ու գործունեությանը:

Լսարանում կուրսանտները կարող են ծանոթանալ հայ պատմիչների, ինչպես նաև օտարազգի և հայ գրողների, մտավորականների` Ջորջ Բայրոնի, Հենրիխ Պետերմանի, Ալեքսանդր Թոմսոնի, Յոզեֆ Մարկվարտի, Նիկողայոս Մառի, Անտուան Մեյեի, Կորյունի, Մխիթար Սեբաստացու, Միքայել Չամչյանի, Հրաչյա Աճառյանի, Լեոյի և ուրիշների կյանքին ու գործունեությանը, հայոց լեզվի մասին նրանց արտահայտած կարծիքներին:

Լսարանը կնպաստի կուրսանտների` հայոց բանակի ապագա սպաների հայեցի դաստիարակությանը: Այստեղ անցկացվող դասերը, ֆակուլտատիվ պարապմունքները, գիտագործնական կոնֆերանսները կնպաստեն հրամանատարական խոսքի ճիշտ ու նպատակային կառուցմանը, կուրսանտների գիտական մտքի ձևավորմանը, կզարգացնեն նրանց լեզվամտածողությունը, գրավոր ու բանավոր խոսքը, կհարստացնեն ռազմական բառապաշարը:

ՀՀ ՊՆ Վ. Սարգսյանի անվան ռազմական ինստիտուտի պետ, գեներալ-լեյտենանտ Մ. Կարապետյանը լսարանի բացման արարողության իր խոսքում ասաց, որ խորհրդային զինվորական կրթություն ստացած սպաները հայերեն զինվորական տերմինաբանությունն անցնելիս որոշակի դժվարություններ են ունենում: Հուսով եմ՝ հայերենի ուսուցանումը այսպիսի տրամադրող լսարանում կնպաստի մայրենի լեզվին ավելի խորը տիրապետելու գիտակցականության, ինքնուրույն վերլուծություններ կատարելու ունակության և շրջապատող աշխարհի հետ անկաշկանդ հաղորդակցվելու կարողության զարգացմանը:

ՄԱՐԱՏ ԲԱՂԴԱՍԱՐՅԱՆ

Լուս.` ԱՐԹՈՒՐ ՍՏԵՓԱՆՅԱՆԻ