ՉԱՐԻՔԸ ՉԻ ԿԱՐՈՂ ՀԱՂԹԵԼ

Թալիշ-Մուղանյան հանրապետության նախագահ, թալիշ ժողովրդի առաջնորդ Ալաքրամ Հումմաթզոդայի (Գնդապետ Հումմաթով) ուղերձը հայ ժողովրդին Հայոց մեծ եղեռնի 100-րդ տարելիցի կապակցությամբ:

(Հեռարձակվել է Թալիշստանի ազգային հեռուստատեսությամբ)

Իմ հարազատ բարեկամներ

Մենք՝ թալիշներս, ցավակցում և սգում ենք Հայ ժողովրդին պատուհասած այս մեծագույն ողբերգությունը: Թող Բարձրյալն այլևս որևէ ժողովրդի նման ծանրագույն փորձության չենթարկի:

1915 թվականի ապրիլի 24-ը սգո օր է հայ ժողովրդի օրացույցում. սակայն այդ ողբերգությունը սև օր է համայն մարդկության համար:

Պատմությունը դեռ իր գնահատականը չի տվել անմարդկային այդ գազանություններին, որոնք բնորոշվում են որպես ցեղասպանություն: Եվ ոչ մի ժողովուրդ չի կարող անհետանալ երկրի երեսից, քանզի ամեն ժողովուրդ ստեղծված է Աստծո կողմից: Մարդն ինչպե՞ս կարող է ոչնչացնել Աստծո արարչագործությունը: Աստված մարդուն ազատ է ստեղծել, և ամեն ժողովուրդ այս աշխարհում ազատ ապրելու իրավունք ունի:

Օսմանցի պանթյուրքիստները կոտորելով 1,5 միլիոն հայերի, չկարողացան այս ժողովրդին ծնկի բերել. վկան այսօրվա Հայաստանի Հանրապետությունն է, ժողովրդավարական այս երկիրը: Չարիքը չէր կարող հաղթել հերոսական և մեծ հայ ժողովրդին, որովհետև անհնարին է փակել ազատության ձգտող ժողովրդի ճանապարհը:

Անկախությունը ժողովուրդներին Աստծո կողմից տրված պարգև է:

Մենք՝ թալիշներս, ժողովրդի նկատմամբ իրագործված գազանությունների մասին լսելով չէ միայն, որ գիտենք. որովհետև մենք ինքներս երեկ և այսօր էլ դեռևս մեր իսկ հայրենիքում, որ ներկայիս Ադրբեջանի հարավային մասն է զբաղեցնում, ենթարկվում ենք անմարդկային հալածանքների ու բռնությունների:

1993 թվականին, երբ մենք փորձեցինք մեր պապենական հողերում մեր անկախ պետականությունն ստեղծել, նույն պանթյուրքիստները, բայց արդեն Ադրբեջանական Հանրապետություն կոչվող երկրում, մեզ հետ նույնպիսի դաժանությամբ վարվեցին: Մեր որդիները հազարներով կոտորվեցին ու ոչնչացվեցին, հալածվեցին ու տառապեցին Ադրբեջանի բանտերում, աքսորվեցին սեփական տնից ու հայրենիքից:

Պանթյուրքիստները միշտ էլ սատանայական հրճվանքով են ոչնչացրել հարևան ժողովուրդներին:

Թող ամենակարող Աստված հայ ժողովրդին համբերությամբ զինի. որովհետև հեռու չէ այն օրը, երբ հայ և թալիշ ժողովուրդները բարեկամության իրենց տոնը կնշեն Ադրբեջանի լծից ազատագրված Թալիշստանում՝ մեր փառապանծ մայրաքաղաքում՝ Լանքոնում (Լենքորան):

Թալիշ ժողովուրդը ձեզ հետ է, եղբայրական հա՛յ ժողովուրդ:

Մեր ճանապարհը արդարության և ազատության ճանապարհն է:

Կեցցե՛ հայ ժողովուրդը:

Կեցցե՛ Մեծ Հայաստանը:

Կեցցե՛ հայ և թալիշ ժողովուրդների բարեկամությունը:

Կեցցե՛ ազատ, անկախ Թալիշստանի Հանրապետությունը՝ մեր ժողովրդի երազանքների հայրենիքը:

Գ. ԱՍԱՏՐՅԱՆ