«ԱՍՊԵՏ» ՃԱՄԲԱՐՈՒՄ

Արդեն ութերորդ տարին է, ինչ ԼՂՀ պաշտպանության, կրթության, գիտության ու սպորտի նախարարությունները համատեղ կազմակերպում են ռազմամարզական ճամբար, որտեղ իրենց ամառային հանգիստն են անցկացնում Հայոց երկու հանրապետությունների և Սփյուռքի պատանիները: Սկզբում ճամբարները գործում էին զորամասերին կից: Հետագայում Ասկերանի շրջանի Այգեստան գյուղի մոտակա գեղատեսիլ անտառապատ ձորակում ստեղծվեց «Ասպետ» ռազմամարզական ճամբարը: Այս տարի Քաշաթաղի շրջանից ռազմամարզական միջոցառումներին մասնակցեցին 11-րդ դասարանի 12 տղաներ՝ Կովսականի, Գետամեջի, Մարտունաշենի, Գողթանիկի միջն. դպրոցներից, Կովսականի Թ. Կրպեյանի անվ. միջն. դպրոցի զինղեկ Արթուր Հովհաննիսյանի գլխավորությամբ: Նրա հավաստմամբ՝ ջոկատն աչքի է ընկել կարգապահությամբ եւ լավ հանդես եկել մրցույթներում:

Գետամեջի միջն. դպրոցի աշակերտներից Հրանտ Անտոնյանը շահել է 1-ին մրցանակ կրակային վարժությունից՝ նվեր ստանալով ժամացույց և գնդակ, իսկ Նարեկ Խաչատրյանն ու Կարեն Դալլաքյանը արժանացել են շնորհակալագրի: Գրիգոր Խաչատրյանն արժանացել է «Լավ ճամբարական» մրցանակի: Երկու գերատեսչությունների շնորհակալագրեր են ստացել նաև Կովսականի և Գողթանիկի միջն. դպրոցի աշակերտներ Սամվել Օհանյանը, Աշոտ Աբրահամյանը: Պարգևի է արժանացել նաև ջոկատի հրամանատարը:

Զրույցի ընթացքում տղաները խոստովանեցին. դժվարություններ եղել են, սակայն սովորել են հաղթահարել: Ուրախ են, որ ճամբարում մոտիկից ծանոթացել են բանակային կյանքին, շփվել իրենց տարեկիցների հետ, նոր ընկերներ ու ծանոթներ ձեռք բերել: Պատրաստ են նորից լինել «Ասպետում» և մասնակցել ռազմամարզական մրցույթների:

Էդ. ՉՈՒԽԱՋՅԱՆ