ԱՅԼԵՎՍ ՀԱՄԱԼՐՎԱԾ ԵՆ ԲՈԼՈՐ ՍՏՈՐԱԲԱԺԱՆՈՒՄՆԵՐԸ. ՀՀ ՊԱՇՏՊԱՆՈՒԹՅԱՆ ՆԱԽԱՐԱՐ ՍԵՅՐԱՆ ՕՀԱՆՅԱՆԻ ԵՐԱԽՏԻՔԻ ԽՈՍՔԸ ԿԱՄԱՎՈՐԱԿԱՆՆԵՐԻՆ

Այս օրերին բազմաթիվ ջոկատներ, օգտագործելով իրենց ունեցած փորձը, մեկնեցին և համալրեցին պաշտպանության բանակի բոլոր ստորաբաժանումները, և կարծում եմ, որ այսօրվա հայկական բանակի հրամանատարների և զինվորների պատրաստությունը շաղախվեց մեր ազատամարտի վետերանների, երկրապահների, կամավորականների փորձառության հետ, և դա էլ հիմք հանդիսացավ այն հաջողության, որը մենք ունեցանք արցախյան ամբողջ ճակատում:

Ես իմ երախտիքի խոսքն եմ հղում մեր բոլոր մարտական ընկերներին, բոլոր կամավորականներին: Այդ խոսքերը ոչ միայն ես եմ հղում, այլև, կարծում եմ, ամբողջ ժողովուրդը, մեր ղեկավարությունը, և հատկապես` բանակի ողջ անձնակազմը:

Վտանգի պահին մենք միշտ միասնական ենք եղել: Եվ այս փորձությունն նույն կերպ էլ մենք մեզ վրա վերցրեցինք: Այսպիսի փորձություն մեզ միշտ սպասում է: Սա ուզում եմ ասել այն կամավորականներին, ովքեր եկան, հերթագրվեցին, արտահայտեցին իրենց պատրաստակամությունը, բայց քանի որ պաշտպանության բանակի հրամանատարությունը դիմել է ինձ և իր երախտիքի խոսքերի հետ միասին ասել, որ այլևս համալրված են բոլոր ստորաբաժանումները, մնացածը թող զբաղվեն իրենց մարտական պատրաստությամբ, որպեսզի անհրաժեշտության դեպքում մեկնեն Արցախ:

Այս խոսքերն ուզում եմ փոխանցել իմ բոլոր մարտական ընկերներին և ասել, որ երբևիցէ չհուսահատվեք, չընկճվեք: Մեզ անպայման անհրաժեշտ են համարձակ մարտական ընկերներ: Այդ համարձակությունը, զգոնությունը թող միշտ ձեզ հետ լինի, և լինելով այստեղ` Հայաստանում, միշտ պատրաստ եղեք, որովհետև մեր պայքարը մշտական է, անհրաժեշտության դեպքում մենք ձեզ կտեղեկացնենք, և դուք անպայման կմեկնեք Արցախի մեր հայրենակիցների անվտանգությունն ապահովելու:

Մենք, իհարկե, այս օրերին, հաջողությունների հետ մեկտեղ, շատ-շատ զինծառայողների, ազատամարտիկների հարազատների հետ ցավ ենք ապրում, որովհետև նրանք իրենց կյանքը տվել են մեր Հայրենիքի սուրբ հատվածի` Արցախի պաշտպանության համար: Այսօրվա մեր ունեցած հաջողությունները, հաղթանակները մեզ անպայման ստիպում են, որ ցավը շաղախվի մեր հերոսների կատարած սխրանքի հետ և կարծրանա որպես պատասխանատվություն` հետագա մեր գործողությունների համար:

Եվս մեկ անգամ իմ շնորհակալական խոսքն եմ հղում ձեզ բոլորիդ, եղեք համբերատար, և անպայման հաղթանակները կլինեն մեզ հետ: