ԱՅՑԵԼՈՒԹՅՈՒՆ ԶՈՐԱՄԱՍ

Նոյեմբերի 20-ին Երևանի  Հովաննես Շիրազի  անվան թիվ 169 հիմնական դպրոցի 2-րդ դասարանի սաները բանակ-հասարակություն կապերի ամրապնդման շրջանակներում այցելեցին 5-րդ բանակային զորամիավորման զորամասերից մեկը:

Աշակերտները ուսուցիչների և ծնողների հետ շրջեցին զորամասի տարածքում, ծանոթացան զինվորների առօրյային, սպառազինությանն ու զինտեխնիկային: Իրենց տեսածից ու զգացածից տպավորված՝ երեխաները եղան նաև զորամասի ճաշարանում, համտեսեցին զինվորական ճաշատեսակները:

Միջոցառման ընթացքում դպրոցի սաները ներկայացան համերգային ծրագրով: Հայրենասիրական և ժողովրդական երգերի կատարումների ժամանակ նրանց միացան նաև պարտադիր ժամկետային զինծառայողները:

Կարևորելով նմանատիպ միջոցառումները՝ զորամասի հրամանատարի տեղակալ, փոխգնդապետ Կ. Խումարյանը փաստեց, որ դրանք նպաստում են բանակ-հասարակություն կապի ամրապնդմանը, ազգ-բանակ հայեցակարգի կայացմանը:

Հ. Ավետյան

գնդապետ

5-րդ բանակային զորամիավորում