«ՓՈՔՐ ՄՀԵՐ» ԿՐԹԱՀԱՄԱԼԻՐԻ ՍԱՆԵՐԸ ԿՈՒՍԱՆԵՆ ՊՆ ՄՈՆԹԵ ՄԵԼՔՈՆՅԱՆԻ ԱՆՎԱՆ ՌԱԶՄԱՄԱՐԶԱԿԱՆ ՎԱՐԺԱՐԱՆՈՒՄ
2004 թվականից առ այսօր «Փոքր Մհեր» կրթահամալիրը իր իսկ կանոնադրությամբ նախատեսված կրթական և այլ ծրագրերի իրականացմամբ նպաստում էր անչափահասների, այդ թվում թափառաշրջիկ և անապահով երեխաների ռազմահայրենասիրական պատրաստությանը: Կրթահամալիրը տարիներ շարունակ իր սաներին նախապատրաստել է ռազմական մասնագիտական բարձրագույն ուսումնական հաստատություններ ընդունվելուն` պատանիների շրջանում ձևավորելով և զարգացնելով զինվորական պարտքի նկատմամբ հավատարմության զգացում:
ՀՀ կառավարության համապատասխան որոշմամբ և ռազմական կրթության ոլորտում իրականացվող բարեփոխումների տրամաբանությամբ մշակվել է «Փոքր Մհեր» կրթահամալիրը ՀՀ ՊՆ Մոնթե Մելքոնյանի անվան ռազմամարզական վարժարանի հետ միավորելու ծրագիրը: Ի սկզբանե լինելով ավագ դպրոց՝ ՊՆ Մոնթե Մելքոնյանի անվան ռազմամարզական վարժարանը այսօր թերևս ավելի մեծ փորձ ունի, քան հանրապետությունում գործող նորաստեղծ ավագ դպրոցները: Անցնելով երկար ճանապարհ՝ վարժարանը 22 տարիների ընթացքում հասել է մեծ հաջողությունների: 2007 թ.-ից մասնակցելով տարբեր միջազգային հավաքների՝ վարժարանի սաները մշտապես մրցանակներով են վերադարձել հայրենիք:
Վարժարանի շրջանավարտների 90%-ից ավելին դիմում և ընդունվում է ՀՀ և արտերկրի ռազմաուսումնական հաստատություններ:
***
«Փոքր Մհեր» կրթահամալիրի սաներին հունվարի 11-ին հանդիսավորությամբ ընդունեցին ՀՀ ՊՆ Մոնթե Մելքոնյանի անվան ռազմամարզական վարժարանում: Շարահրապարակում նրանց ողջունեց վարժարանի պետ, գնդապետ Վիտալի Ոսկանյանը:
Բուժզննում անցնելուց հետո հայկազունները ստացան անկողնային պարագաներ եւ վարժարանի սաների, մանկավարժների ու սպաների ուղեկցությամբ ծանոթացան վարժարանի կենցաղային պայմաններին, առօրյայի կազմակերպմանը, որում էլ առաջիկա օրերին աստիճանաբար կներգրավվեն:
