2016Թ. ՈՒՍՈՒՄՆԱԿԱՆ ՏԱՐՎԱ ԱՄՓՈՓՈՒՄ ԶՈՐԱՄԻԱՎՈՐՈՒՄՆԵՐՈՒՄ

Օրերս 1-ին և 4-րդ բանակային զորամիավորումներում ամփոփվեց 2016թ. ուսումնական տարին: Ամփոփման նիստերին մասնակցում էին ՀՀ ԶՈՒ գլխավոր շտաբի պետ, գեներալ-լեյտենանտ Մովսես Հակոբյանը, ԳՇ պետի տեղակալ, գեներալ-մայոր Օնիկ Գասպարյանը, Վայոց Ձորի մարզպետ Հարություն Սարգսյանը, Սյունիքի մարզպետ Վահե Հակոբյանը, ինչպես նաև կայազորների իրավապահ մարմինների ղեկավարներ:

1-ին զորամիավորումում հաշվետու զեկույցներով հանդես եկան զորամիավորման հրամանատարի տեղակալները: Զեկուցողները ներկայացրին զինծառայողների պատրաստության, զինվորական կարգապահության, անձնակազմի բարոյահոգեբանական վիճակը, նշված ոլորտներում առկա խնդիրներն ու դրանց բարելավման ուղիները: Մանրամասն խոսեցին նաեւ մարտական հերթապահության կազմակերպման ու իրականացման միջոցառումների մասին։

Անդրադարձ եղավ անձնակազմի մարտական և բարոյահոգեբանական պատրաստության ուղղությամբ անցկացվող միջոցառումներին, վարժանքներին ու տարաբնույթ զորավարժություններին:

Զեկուցողները նշեցին, որ անցած տարվա ընթացքում զորամիավորումում շարունակվել են մարտական ու զորահավաքային պատրաստականության, մարտական պատրաստության, զինվորական կարգապահության մակարդակի բարձրացման, սպառազինության և ռազմական տեխնիկայի արդիականացման և պատշաճ սպասարկման աշխատանքները: Իրականացվել են մարտական հերթապահության բարելավմանը միտված կարևոր գործողություններ։

ՀՀ ԶՈՒ գլխավոր շտաբի պետ, գեներալ-լեյտենանտ Մովսես Հակոբյանն իր ելույթում նշեց տարվա ընթացքում արձանագրված դրական միտումները, որոնք պետք է կարևոր  ուղենիշ լինեն 2017 ուսումնական տարվա համար, իսկ որոշակի բացթողումները շտկելու համար պետք է տարվի միասնական և հետևողական աշխատանք: ՀՀ ԶՈՒ գլխավոր շտաբի պետը համապատասխան հանձնարարականներ տվեց բացթողումները վերացնելու համար, ինչով էլ էապես  կբարձրանա զորամիավորման ենթակա զորամասերի մարտունակությունը:

Ամփոփման ավարտին 2016թ. ուսումնական տարվա ընթացքում մարտական պատրաստության բարձր մակարդակի և բարեխիղճ ծառայության համար մի շարք զինծառայողներ արժանացան  պարգևների:

1-ին բանակային զորամիավորման թղթակցական կետ

♦♦♦

Գնդապետ Ա. Բուդաղյանը ներկայացրեց 4-րդ բանակային զորամիավորման մարտական և զորահավաքային պատրաստականության վիճակը, մարտական կիրառման խնդիրները, մարտական հերթապահության իրականացման առանձնահատկությունները: Նա խոսեց տարբեր ծառայությունների աշխատանքի, արձանագրված հաջողությունների ու դեռևս լուծման սպասող խնդիրների, թերությունների մասին: Գնդապետ Բուդաղյանը նշեց իրենց ֆունկցիոնալ պարտականությունները բարեխիղճ կատարող, ինչպես նաև առօրյա ծառայության ընթացքում որոշակիորեն թերացող սպաներին՝ ընդգծելով մի շարք բացթողումների վերացման ուղղությամբ տրված համապատասխան հանձնարարականների կատարման կարևորությունը:

Զորամիավորման հրամանատարի տեղակալ, գնդապետ Սամվել Պողոսյանն անդրադարձավ զորամիավորման ենթակա զորամասերի մարտական պատրաստականության վիճակին: Վերլուծելով նախորդ տարվա ընթացքում կատարված աշխատանքները՝ շեշտեց զորամասերում տեղ գտած թերությունները, դրանց վերացման համար անհրաժեշտ միջոցառումները:

Զորամիավորման հրամանատարի տեղակալ, գնդապետ Վահրամ Հարությունյանը զեկուցեց ստորաբաժանումներում բարոյահոգեբանական վիճակի, կարգապահության մասին: Ներկայացրեց զինվորական դաստիարակության ուղղությամբ կատարված աշխատանքները, ձեռքբերումներն ու բացթողումները: Գնդապետ Հարությունյանը մատնանշեց այն միջոցառումները, որոնց շնորհիվ նախորդ տարվա համեմատ նվազել են անցանկալի դեպքեր-պատահարները:

Զեկույցներով հանդես եկան նաև գնդապետ Էդուարդ Տոնոյանը և գնդապետ Մհեր Մարտիկյանը՝ զորամիավորման սպառազինության և ռազմական տեխնիկայի պահպանման և շահագործման վիճակը, թիկունքային ապահովման խնդիրներն ու կազմակերպչական աշխատանքները թեմաներով: Նշենք, որ երկու ոլորտներում էլ 2016թ. ուսումնական տարում արձանագվել է առաջընթաց, նախատեսված միջոցառումները կատարվել են ամբողջությամբ:

Ամփոփելով ռազմական խորհրդի նիստը՝ զորամիավորման հրամանատար, գնդապետ Վալերի Քոչարյանը փաստեց, որ զորամիավորումում առաջընթացն ակնառու է բոլոր ուղղություններով, սակայն անելիքները դեռ շատ են: Նա հավաստիացրեց, որ ստորաբաժանումները մարտունակ են, ունակ կատարելու իրենց առջև դրված մարտական առաջադրանքը: Այնուամենայնիվ, յուրաքանչյուր զինծառայող պետք է գիտակցի իր ուսերին դրված ահռելի պատասխանատվությունը սեփական ժողովրդի անվտանգության ապահովման սրբազան գործում և շարունակի կատարելագործվել:

Գեներալ-լեյտենանտ Մովսես Հակոբյանը մի շարք հանձնարարականներ տվեց զորամիավորման պահպանության, անհրաժեշտության դեպքում պաշտպանության ժամանակ կազմակերպվող միջոցառումների կատարելագործման ուղղությամբ:

Զորամիավորման ռազմական խորհրդի ամփոփիչ նիստը եզրափակվեց ծառայության ընթացքում աչքի ընկած զինծառայողների խրախուսմամբ: Լավագույն զինծառայողները պարգևատրվեցին արժեքավոր նվերներով, պատվոգրերով, շնորհակալագրերով ու կրծքանշաններով:

4-րդ բանակային զորամիավորման թղթակցական կետ