ՄԵԿՆԱՐԿԵՑԻՆ ՀՐԱՄԱՆԱՏԱՐԱԿԱՆ ՀԱՎԱՔՆԵՐԸ

Համաձայն  2018թ. ուսումնական տարվա պատրաստության պլանի` գնդապետ Ժիրայր Պողոսյանի  հրամանատարությամբ գործող զորամիավորման ենթակա զորամասերից մեկում մեկնարկեցին  գծային գումարտակների հրամանատարների և նրանց տեղակալների հրամանատարական հնգօրյա հավաքները:

Միջոցառումն սկսելուց առաջ անցկացվեց մասնակիցների շարային ստուգատես, որը փաստեց, որ բոլոր սպաները պատրաստ են անցկացվելիք հավաքներին:

Այնուհետև սկսվեցին ուսումնական պարապմունքները:

Մեկնարկած  հավաքների ծրագիրը հագեցած էր տեսական և գործնական պարապմունքներով:

Տեսական պարապմունքներն ընթանում են համալրված, համապատասխան կահավորված լսարաններում, ցուցադրական պարապմունքներն էլ՝ շարահրապարակում, մարզահրապարակում, մարտավարական դաշտում, հրաձգարանում, բացազատված տեղամասերում:

Հավաքների նպատակն է մասնակիցների  ունակությունների կատարելագործումը՝ զորքերի ամենօրյա գործունեության ղեկավարման, մարտական պատրաստության պարապմունքների գործընթացի կազմակերպման,  նախապատրաստման, իրականացման և դրա ընթացքի ղեկավարման ուղղությամբ, ինչպես նաև՝  սպաների տեսական գիտելիքների, գործնական վարժվածության մակարդակի և  գործնական ունակությունների բարձրացումը,   ընդգրկված կազմի պատրաստվածության մակարդակի ստուգումը՝ մարտավարական, կրակային, ֆիզիկական և այլ պատրաստություններից, ղեկավար փաստաթղթերի իմացությունից:

Հրամանատարական հավաքները նաև անցած կիսամյակի ընթացքում հայտնաբերված թերությունների վերհանման, դրանց վերացման ուղղությամբ ձեռնարկվելիք միջոցառումների, նաև՝ առաջավոր փորձի ուսումնասիրման և դրանց փոխանակման խնդիրների բացահայտման նպատակ ունեն:

Առաջավոր փորձի ուսումնասիրման և սպաների մասնագիտական աճին նպաստող արդյունավետ մեթոդների, վարժանքների ու եղանակների ընտրության և կիրառման թեմայով առաջին պարապմունքն անցկացրեց հավաքների ղեկավար, զորամիավորման հրամանատար, գնդապետ Ժիրայր Պողոսյանը:

-Հավաքների հիմնական նպատակը զորամիավորման հրամանատարական կազմի գիտելիքների և նրանց ֆունկցիոնալ պարտականությունների կատարման կատարելագործումն է,- ասաց նա:

Հավաքի ղեկավարն իր խոսքում առանձնակի ուշադրություն դարձրեց մարտավարական պատրաստությանը,  զորամիավորման գումարտակների մարտական պատրաստության, տեսական և գործնական  գիտելիքներին, նշելով, որ նրանց հրամանատարներն ու ուսուցանողներն ամենամեծ   դերն ունեն ծառայության, ամենօրյա խնդիրների իրագործման և մարտական գործողությունների վերսկսման դեպքում:

Հնգօրյա հավաքների առաջնահերթ խնդիրը գումարտակների  հրամանատարների և նրանց տեղակալների մարտական փորձի, գործնական և տեսական  գիտելիքների  բարձրացումն ու ամրապնդումն է, նրանց  լիարժեք ուսուցանումը,  որպեսզի, հարկ եղած դեպքում, կարողանան բարձր մակարդակով   իրագործել դրանք, իրենք էլ իրենց հերթին անձնակազմերին հասցնեն ստացած գիտելիքները:

-Անցկացվող հավաքներն արդեն ենթադրում են, որ  արդյունքում կունենանք հզոր և մարտունակ, բոլոր առարկաներից պատրաստված  գումարտակներ, որոնք պատրաստ կլինեն յուրաքանչյուր պահի ցանկացած մարտական  խնդիր կատարելուն,- նշեց հրամանատարը:

Հավաքի թեմաներն ընտրված էին համապատասխան  ուղղություններով՝ հաշվի առնելով զինված ուժերի ամենօրյա գործունեության ժամանակ զարգացման առաջնահերթությունները, շեշտը դնելով բոլոր օղակներում ծառայության բարելավմանը:

Հավաքները, ինչպես միշտ, անց են կացվում  դասախոսությունների, զեկույցների, սեմինարների, զրույցների և ստուգարքների, մարտավարական պարապմունքների, տեխնիկայի և սպառազինության ուսումնասիրման  գործնական պարապմունքների, գործառույթային  պարտականությունների յուրացման վարժանքների, մեթոդական և ցուցադրական պարապմունքների տեսքով:

Առանձին դասաժամեր են տրամադրվել սպառազինության, տեխնիկայի նորոգման և շահագործման, հրետանու պատրաստության, պաշտպանության, ինժեներական  նախապատրաստման, տեղագրական ծառայության, ռազմական հոգեբանության, մանկավարժության, հայ զինվորի գաղափարական արժեհամակարգի, բարոյահոգեբանական վիճակի, ՀՀ զինված ուժերում դաստիարակչական աշխատանքի, վարժանքների, մարզումների և զորավարժությունների կազմակերպման, մարտական և զորահավաքային պատրաստականության, կրակային, ֆիզիկական, շարային, ՌՔԿՊ, կապի  պատրաստության, օրինակելի հերթապահության, փաստաթղթերի վարույթների  թեմաներին,  որոնց ուղղությամբ պարապմունքներ անցկացրին զորամիավորման վարչակազմի ներկայացուցիչները,  համապատասխան ծառայությունների պետերը:

Հատուկ ուշադրություն է դարձվում անվտանգության կանոնների խստիվ պահպանմանը, տեխնիկայի անվտանգ շահագործմանը:

Հավաքների ավարտին ստուգարքների միջոցով խմբերի ղեկավարները կստուգեն մասնակիցների ֆիզիկական և շարային պատրաստության աստիճանը:

Զորամիավորման հնգօրյա հավաքները, նրանց իրական գնահատականները դեռ առջևում են:

Հավաքի ղեկավար, գնդապետ Ժիրայր Պողոսյանը փաստեց, որ սկիզբն արդեն խոստումնալից է. հրամանատարները օժտված են ռազմական գիտելիքներով, գաղափարապես և հոգեբանորեն լավ նախապատրաստված են, ունեն հրամանատարին անհրաժեշտ հմտություններ և կարողություններ և պատրաստ են անցած ուսումնական փուլերի  ձեռքբերումներն ամրապնդելով՝ բոլոր ուղղություններում հասնել բարձր արդյունքների:

Հրամանատարական հավաքներ են նաև մայոր Սերոբ Բազիկյանի հրամանատարությամբ գործող 1-ին զորամիավորման 4-րդ զրահատանկային գումարտակում:

1-ի ԲԿ թղթակցական կետ