ՆԱՏՕ-Ի ՓՈՐՁԱԳԵՏՆԵՐԻ ՎԵՐԱՊԱՏՐԱՍՏՄԱՆ ԴԱՍԸՆԹԱՑՆԵՐԸ
ՆԱՏՕ-ի Պաշտպանական կրթության զարգացման ծրագրի և ՀՀ պաշտպանության նախարարության միջև 2018թ. համագործակցության պլանի համաձայն՝ սեպտեմբերի 17-ից 20-ը ՀՀ ՊՆ Վ.Սարգսյանի անվան ռազմական համալսարանի հրամանատարաշտաբային ֆակուլտետում ՀՀ ՊՆ ռազմաուսումնական հաստատությունների ավագ դասախոսական և մեթոդական կազմի ներկայացուցիչների համար ՆԱՏՕ-ի Պաշտպանական կրթության զարգացման ծրագրի փորձագետները անցկացրել են վերապատրաստման դասընթացի 1-ին փուլը:
Ողջունելով հյուրերին՝ ՀՀ ՊՆ Վ.Սարգսյանի անվան ռազմական համալսարանի պետի առաջին տեղակալ, գնդապետ Խաչիկ Խաչատրյանը և ՀՀ պաշտպանության նախարարության և ՆԱՏՕ-ի Պաշտպանական կրթության զարգացման ծրագրի համագործակցությունը համակարգող Տիգրան Հարությունյանը կարևորել են ՆԱՏՕ-ի հետ ռազմական կրթության ոլորտում համագործակցությունը և մասնավորապես վերոնշյալ միջոցառումը, որը միտված է Հայաստանի պաշտպանական գերատեսչության ռազմական ուսումնական հաստատությունների ավագ դասախոսական կազմի փորձի հարստացմանը և ռազմական կրթության ոլորտում նոր մոտեցումների ու մեթոդների ներդրմանը:
Քննարկումների ընթացքում արծարծվել են պաշտպանական ու ռազմական կրթության և ուսուցման բնագավառում կիրառվող դասավանդման մեթոդիկային, ակտիվ ուսուցման և դասընթացի նախագծման մեթոդներին, անհատական մոտեցման ռազմավարությանը, ուսումնական նպատակների նկատմամբ ուսուցման արդյունքների գերակայությանն առնչվող հարցեր:
Վերապատրաստման դասընթացը նախատեսվում է իրականացնել 3 փուլով, ընդհանուր առմամբ` 1.5 տարի տևողությամբ:
Խորագիր՝ Նորություններ
