ՇԱՇԿՈՒ ԶԱՐՄԱՆԱՀՐԱՇ ԱՇԽԱՐՀՈՒՄ

Շաշկին բոլորովին էլ պարզունակ խաղ չէ, ընդհակառակը՝ հետաքրքրաշարժ, ստեղծագործական խաղ է՝ օժտված շատ բարդ խաղային կառուցվածքով: Անչափ գրավիչ և հետաքրքիր խաղ լինելով հանդերձ, առկա են անսպասելիության գործոնը, թաքնված հնարավորությունների, կոմբինացիաների որոնումը: Դրանում ինքներդ կհամոզվեք, եթե փորձեք լուծել «Հայ զինվոր» հանդեսում ձեզ ներկայացվող խնդիրները:

Շաշկի խաղն ավելի քան հինգ հազար տարվա պատմություն ունի: Լուվրում  պահպանվում  են  եգիպտական փարավոնների շաշկու խաղատախտակներ: Իսկ  արևելյան արքաների գերեզմանաքարերին պահպանվել են շաշկու խաղատախտակներով պատկերներ (մ.թ.ա 3-րդ հազարամյակ): Այս զարմանահրաշ խաղը սիրել, խաղացել և բարձր  են գնահատել թագավորներ, զորավարներ, ժամանակի նշանավոր մտավորականներ՝ Պետրոս Մեծը, Սուվորովը, Նապոլեոն Բոնապարտը, Վոլտերը, Ժան Ժակ Ռուսոն, Չարլզ Դարվինը, Լև Տոլստոյը, Կարլ Մարքսը: Շախմատի աշխարհի երկրորդ չեմպիոն Էմանուել Լասկերն ասել է. «Շաշկին շախմատի արժանապատիվ և զառամյալ մայրն է»:

Շաշկի խաղն աշխարհում ամենից շատ տարածված խաղերից է:  Գոյություն ունեն այս խաղի շատ տեսակներ, որոնցից ամենատարածվածը չորսն են՝

1. 100 վանդականոց շաշկի, որը նաև անվանում են միջազգային շաշկի:
2. Ռուսական 64 վանդականոց շաշկի, որը տարածված է նաև մեր երկրում:
3. Բրազիլական 64 վանդականոց շաշկի, բայց արդեն միջազգային շաշկու կանոններով:
4. Անգլիական կամ ամերիկյան 64 վանդականոց շաշկի, որը կոչվում է չեկերս:

Կան  նաև ավելի քիչ տարածված տեսակներ,  օրինակ` կանադական  144  վանդականոց, իտալական, ֆրանսիական, իսպանական, չեխական և այլն, որոնք ունեն իրենց հատուկ կանոնները:

ՆՇԱՆ ԱԼԱՎԵՐԴՅԱՆ

Հայաստանի բազմակի չեմպիոն,

IDF վարպետ