Հայ զինվոր

ՆԱՄԱԿ ԶԻՆՎՈՐԻՆ

Երեւանի N125 դպրոցի աշակերտների նամակները առաջնագծում ծառայող զինվորներին

Սահմանին կանգնած հայ զինվոր, դու քո խիզախությամբ մեզնից վանում ես վախն ու անվստահությունը, հավատ ներշնչում մեր խաղաղ ապագայի նկատմամբ: Դժվար, շատ դժվար է քո ծառայությունը, բայց մենք վստահ ենք, որ դու քաջաբար պաշտպանում ես սահմանը՝ չխնայելով նույնիսկ սեփական կյանքդ, ինչպես չխնայեցին իրենց կյանքը ապրիլյան պատերազմի մասնակից մեր հերոս տղաները: Ես միայն մի ցանկություն ունեմ՝ խաղաղ երկինք աշխարհի բոլոր զինվորներին:

Էդգար Սաֆարյան

5-րդ դասարան

♦♦♦

Հերոսաշունչ ժամանակների քաջազուն զինվորներ, մենք գիտենք, որ ձեզ համար չկա առավել սրբազան պարտականություն, քան հայրենիքի պաշտպանությունը:

Կարեւոր չէ զորքի քանակը, եթե զինվորը կռվում է իր հողի համար եւ պաշտպանում իր հայրենիքը, արդար է նրա կռիվը ու հաղթանակը՝ անխուսափելի:

Անահիտ Գոյումջյան

5-րդ դասարան

♦♦♦

Ուրախ եմ եւ հպարտ, որ հնարավորություն ունեմ քեզ նամակ գրելու եւ իմ խոսքերով քեզ ոգեւորելու ու ոգեշնչելու: Ես գիտեմ, դու պատվով ես կատարում պարտքդ մեր հայրենիքի հանդեպ, պաշտպանում ես մեզ ու մեր սահմանները, որովհետեւ դու հայ ես, իսկ քաջությունն ու խիզախությունը հայի արյան մեջ են: Ես ու իմ հասակակիցները՝ որպես ապագա զինվորներ, հպարտանում ենք քեզնով ու վստահեցնում՝ քեզ պես նվիրումով մենք էլ ենք ծառայելու:

Ռոբերտ Ղազարյան

5-րդ դասարան

♦♦♦

Ամեն առավոտ, երբ բացում եմ աչքերս ու տեսնում եմ խաղաղ երկինքը, այն երկինքը, որի խաղաղությունը ապահովում ես դու՝ ամառ թե ձմեռ, սիրտս լցվում է երախտագիտության ջերմ խոսքերով. շնորհակալ ենք քեզ, հայ զինվոր, ուզում եմ, շատ եմ ուզում , որ դու էլ ամեն օր արթնանաս խաղաղ երկնքի ներքո:

Սիրով՝ քո փոքրիկ քույրիկ

Մարիաննա Մովսեսյան

♦♦♦

Մենք դպրոցում շատ ենք խոսում մեր անվախ զինվորների մասին, հպարտանում նրանց քաջ, հերոսական պահվածքով:

Սիրելի՛ զինվորներ, դուք այդտեղ արիաբար մեր հայրենիքի սահմաններն եք անխախտ պահում, իսկ այստեղ ձեր ծնողները անքուն գիշերներ են անցկացնում՝ անհամբեր սպասելով ձեր վերադարձին:

Զինվորնե՛ր ջան, շնորհակալ ենք բոլորիդ մեր խաղաղ բացվող ամեն օրվա համար, բոլորիդ խաղաղ ծառայություն, բարի վերադարձ հարազատ օջախ:

Մանե Մարտիրոսյան

5-րդ դասարան

♦♦♦

Քառօրյա պատերազմի ընթացքում դու եւ ընկերներդ ապացուցեցիք, որ պարտադիր չէ աշխարհի լավագույն զենքերն ունենալ, կարեւորը՝ խիզախությունն ու բարձր մարտական ոգին է, որ ստիպում է թշնամուն ծնկի գալ: Թող քո ծառայությունն անցնի առանց պատերազմի, սիրելի՛ զինվոր, եւ դու փառքով ու պատվով վերադառնաս հայրենի տուն, ուր սպասում է գիրկը բաց մայրդ:

Ռիմա Մուղդուսյան

5-րդ դասարան

♦♦♦

Սիրելի՛ զինվոր, ես ամեն անգամ աղոթում եմ քո կյանքի համար, խնդրում եմ Աստծուն, որ քեզ հետ լինի, քեզ պահապան, եւ դու կատարես քո սրբազան պարտքը եւ ողջ-առողջ տուն վերադառնաս: Թանկագի՛ն զինվոր, ես ցանկանում եմ, որ Հայաստանը միշտ ազատ եւ անկախ լինի, եւ այլեւս ոչ մի հայորդու արյուն չթափվի:

Սվետա Շամիրյան

5-րդ դասարան

♦♦♦

Աշխարհում շատ երկրներ կան իրենց հզոր բանակներով, բայց մեր բանակը՝ հայոց բանակն առանձնանում է: Հայրենի հողի հանդեպ մեր զինվորի սերն անսահման է, նվիրումը անչափելի է: Ամեն խաղաղ բացվող լույս օրվա համար պարտական ենք մեր քաջերին:

Էլեն Համբարձումյան

5-րդ դասարան

♦♦♦

Բարեւ, իմ լա՛վ եղբայր: Այնքան անսովոր է, որ դու տանը չես, որ առավոտյան չես արթնացնում ինձ ու ամեն անգամ չարություն անելիս բարկանում վրաս: Չես պահում հեռախոսս ցածր գնահատական ստանալիս ու կատակներ անում:

Ճիշտ է, ես տխուր եմ, որ դու տանը` մեզ հետ չես, բայց գիտեմ, որ քո ու ընկերներիդ շնորհիվ ենք մենք հանգիստ խաղում: Այնքան էլ լավ չեմ պատկերացնում, թե ինչ է բանակը, բայց կարծում եմ՝ այն շատ կարեւոր է հայ ազգի համար: Այդ պատճառով աշխատում եմ շատ չտխրել ու հպարտանում եմ, որ քո նման պաշտպան եղբայր ունեմ: Միայն, խնդրում եմ, զգույշ եղիր ու թույլ չտաս թշնամուն՝ քեզ կամ ընկերներիդ վնասի: Եղբա՛յրս, քեզ շա՜տ-շա՜տ կարոտել եմ ու անհամբեր օրերն եմ հաշվում, թե երբ ես տուն դառնալու:

Համբուրում եմ:

Ալիս ՊԵտրոսյան

Երեւանի Հ. Շիրազի անվ. թիվ 169 դպրոց

IVա դասարան