ԿԱՅԱՑԱՎ ԲՆԱԿՏԱՐԱԾՔ ՁԵՌՔ ԲԵՐԵԼՈՒ ԾՐԱԳՐԻ ՇԱՀԱՌՈՒՆԵՐԻ ՎԻՃԱԿԱՀԱՆՈՒԹՅՈՒՆԸ

Հունիսի 12-ին կայացավ հիպոտեկային արտոնյալ պայմաններով բնակտարածք ձեռք  բերելու հնարավորություն ընձեռող վարկավորման ծրագրի շահառուների վիճակահանությունը:

Հիշեցնենք, որ կառավարության համապատասխան որոշման համաձայն՝ այսուհետ յուրաքանչյուր տարի թվով 500 պայմանագրային զինծառայողների, սպայական և ավագ ենթասպայական կազմերի  զինծառայողների կտրամադրվեն փաստացի անտոկոս հիպոտեկային վարկեր, ընդ որում՝ մայր գումարի 10 տոկոսը ևս կփոխհատուցի պետությունը:

Առաջինը վիճակահանության թմբուկին է մոտենում փոխգնդապետ Վահե Թամրազյանը: Բացելով վիճակահանության կտրոնը, նա ուրախությամբ փաստեց, որ ինքը երջանիկ շահառուների ցանկում է:

-Այս պահին սրտի թրթիռով և աննկարագրելի հուզմունքով էի սպասում,- մեզ հետ անկեղծացավ փոխգնդապետ Վահե Թամրազյանը:

Փոխգնդապետը մինչ օրս կնոջ, երեխաների, եղբայրների  և ծնողների հետ բնակվել է երկսենյականոց բնակարանում: Այս ամառ Վահեի կյանքում,  շնորհիվ ծրագրի արտոնյալ պայմանների, իրավիճակ կփոխվի. նրա ընտանիքը շուտով  կտոնի այդքան սպասված բնակարանամուտը:

Վիճակահանությամբ ծրագրի շահառուներին միացավ նաև կապիտան Գրիգորյանը: Խաղաղապահ բրիգադի զինծառայողը գոհունակությամբ նշեց, որ   այսպիսի ծրագրերը զինվորականի անդուլ ծառայության հանդեպ գնահատանքի լավագույն դրսևորումներն են, որոնք ոգևորում ու գոտեպնդում են հայրենիքի պաշտպաններին:

-Շատ կարևոր ծրագիր է: 10 տարի սպասում էի այս ծրագրին: Սպաներին այսպիսի վերաբերմունքը օդի ու ջրի պես էր պետք: Այն հետայսու դրական մեծ ազդեցություն կունենա նաև նրանց ծառայության, բարոյահոգեբանական վիճակի վրա, քանզի այս ծրագրով մեկընդմիշտ լուծվում է հազարավոր զինծառայողների, սպայական և ավագ ենթասպայական կազմերի զինծառայողների կեցության հարցը,- ասաց Վահեն:

Վիճակահանության գործընթացին հետևող պաշտպանության փոխնախարար Գաբրիել Բալայանը այս համատեքստում նկատում է. զինծառայողների սոցիալական պայմանների բարելավմանը միտված այս ծրագրին շուտով կմիանան նաև նորերը՝ այդկերպ նաև բարձրացնելով  զինծառայության հանդեպ գրավչությունը:

-Սա մի կարևոր քայլ է գնահատելու զինծառայողների այն վաստակը, որ նրանք բերում են Հայրենիքի պաշտպանությանը: Ծրագիրը լայն արձագանք է գտել զինված ուժերում: Իհարկե, մենք ունենք նաև ձևաչափը զարգացնելու այլ ծրագրեր, այդ թվում՝ սպառողական վարկերի հետ կապված,- հավաստիացրեց փոխնախարար Գաբրիել Բալայանը:

Հավելենք, որ ծրագրի մասին առավել մանրամասն տեղեկատվություն ստանալու, մասնակցության պայմաններին ծանոթանալու համար պայմանագրային զինծառայողները, սպայական և ավագ ենթասպայական կազմերի  զինծառայողները կարող են դիմել ՊՆ զինծառայողների սոցիալական պաշտպանության վարչություն:

ՆԵՐՍԵՍ ԻՎԱՆՅԱՆ

Լուս.՝ ԱՐԵԳ ՎԱՐԴԱՆՅԱՆԻ