ՌԱԶՄԱՄԱՐԶԱԿԱՆ ՄԻՋՈՑԱՌՈՒՄ
Մայիսի 24-ին Երևանի թիվ 40 հիմնական դպրոցում տեղի է ունեցել Հայաստանի Ազգային հերոս Արկադի Տեր-Թադևոսյանի անվան «Կոմանդոս արգելագոտու հաղթահարում» ռազմամարզական միջոցառումը։
Մասնակիցները հաղթահարել են պայմանական ճահճուտային ու փշալարերով անցումները, ուսումնական փամփուշտներով լի արկղերը տեղափոխել մի կետից մյուսը, նռնակներ նետել նշանակետերի ուղղությամբ, ինչպես նաև կատարել ռազմամարզական խաղի կանոններով նախատեսված մյուս առաջադրանքները։
Ինչպես նշել են կազմակերպիչները՝ նմանօրինակ միջոցառումները շարունակական բնույթ են կրելու, քանի որ գլխավոր նպատակը պատանիներին ռազմամարզական հմտություններ փոխանցելն է, նրանց ֆիզիկական ու հոգեբանական պատրաստության զարգացմանը նպաստելը, բանակի հետ կապն ամրապնդելը։
Միջոցառման ավարտին լավագույն արդյունքներ ցուցաբերած մասնակիցները պարգևատրվել են պատվոգրերով։
