ՀՈՒՇԱՔԱՐԻՆ 26 ՀԵՐՈՍՆԵՐԻ ԱՆՈՒՆՆԵՐՆ ԵՆ

Երևանի օլիմպիական հերթափոխի պետական մարզական քոլեջից շատ շրջանավարտներ ու սաներ մասնակից եղան պատերազմին, նրանցից 26-ը զոհվեցին…

Հոկտեմբերի 22-ին քոլեջի բակում տեղի ունեցավ հերոսների ոգեկոչման, հոգեհանգստյան և նրանց նվիրված հուշակոթողի օրհնման արարողությունը: Ներկա էին ծնողներն ու հարազատները, մարտական ընկերները, այդ թվում նաև՝ վիրավոր, ՀՀ   կրթության, գիտության, մշակույթի և սպորտի նախարարի տեղակալ Կարեն Գիլոյանը, ՀՀ մարզական մշակույթի ներկայացուցիչներ, օլիմպիական չեմպիոններ, զինվորականներ, հոգևորականներ: Տուֆակերտ հուշակոթողի վրա 26 Անմահ հերոսների անուններն են փորագրված, հերոսներ, որ մեր երկրի պատիվը կարող էին և շատերը կարողացել են բարձր պահել մարզաշխարհում, սակայն եղավ պատերազմ… Ու նրանք առաջնագծում էին, կռվեցին թշնամու դեմ, հերոսացան: Հուշակոթողի բազալտե պատվանդանին Եղիշեի հայտնի խոսքն է. «Մահ ոչ իմացեալ մահ է, Մահ իմացեալ՝ անմահութիւն»: Զինվորական նվագախումբը հնչեցրեց ՀՀ օրհներգը: Հուշաքարի մոտ պատվո պահակ էին կանգնել հայոց բանակի զինվորները: Արարատ եպիսկոպոս Գալթագճյանը «Տերունական» աղոթքով կատարեց հուշաքարի բացումը: Գևորգ եպիսկոպոս Սարոյանն էլ իր խոսքում Հայոց Վեհափառի անունից զորակցություն, ցավակցություն և Սուրբ հոգու մխիթարություն հայտնեց զոհվածների հարազատներին ու մտերիմներին, քոլեջի անձնակազմին և բոլոր մեր հայրենակիցներին, որոնք այս վերջին պատերազմում կորցրել են իրենց սիրելիներին:

Հոգևոր արարողությունից հետո հավերժությունը խորհրդանշող պսակներ դրվեցին հուշակոթողի մոտ, հընթացս հնչեցին նահատակ քաջորդիների անունները, իսկ  քոլեջի սաները, սպիտակ համազգեստ հագած, խաղաղության աղավնիներ բաց թողեցին երկինք: ԵՕՀՊՄ քոլեջի տնօրեն Վ. Գալուստյանն իր խոսքում դիմելով ծնողներին՝ ասաց. «Ձեր հերոս զավակները իրենց կյանքի գնով դարձան հայ ժողովրդի հարատևման երաշխավորը…»:

ԶՈՀՐԱԲ ԸՌՔՈՅԱՆ