ՀԱՅՈՑ ՀՈՂԻ ԵՎՍ ՄԻ ԽԻԶԱԽ ԶԱՎԱԿ

Հայոց պատմության դասերին լսել ենք շատ պատերազմների մասին, սերտել թվականները, քաջերի անունները, որոնք նաև գրքերի հերոսներ և հաղթանակների խորհրդանիշ են դարձել։ Հիմա, երբ ինքներս ենք պատերազմ տեսել և պատերազմ ապրում, ամեն քաջի մահվան բոթը հարվածում է մեզ…

Ավագ սերժանտ Նարեկ Գևորգյանը ծնվել է 2000 թ. հուլիսի 21-ին Երևանում։ 2006-2015 թթ. սովորել է թիվ 45 հիմնական դպրոցում։ Ուսման հետ մեկտեղ հաճախել է Հայաստանի Կիոկուշին-կան կարատե-դո Հայաստանի ֆեդերացիա, մասնակցել է բազմաթիվ մրցույթների՝ գրավելով բարձր հորիզոնականներ, պարգևատրվել է բազմաթիվ պատվոգրերով և մեդալներով։

Դպրոցն ավարտելուն պես ուսումը շարունակել է Երևանի «Էրեբունի» պետական բժշկական քոլեջում։ Ունեցել է բարձր առաջադիմություն։

-Դպրոցում և քոլեջում լավ էր սովորում, ցանկանում էր պլաստիկ վիրաբույժ դառնալ։ Նարեկը հանգիստ բնավորության տեր մարդ էր, հավասարակշռված, երբեմն խիստ, ամեն հարցում պատրաստակամ: Ժամերով կլսեր առանց ընդհատելու, խորհուրդներ կտար,- այսպես է իր եղբորը բնութագրում Քնարիկը։

Ուսումը կիսատ թողնելով՝ 2019 թ. հունվարի 11-ին զորակոչվել է բանակ: Ծառայության է անցել Մարտակերտի շրջանի Մատաղիսի զորամասում՝ որպես բուժակ։ Ընթացքում ծառայողական վերապատրաստում է անցել N զորամասում՝ ստանալով կրտսեր սերժանտի կոչում։ Վերադառնալով Մատաղիսի զորամաս՝ այնտեղից տեղափոխվել է Թալիշ։

…2020 թ. սեպտեմբերի 27-ին տղաները «տագնապ» հրաման ստանալով՝ անմիջապես վաշտի հրամանատարի ուղեկցությամբ շտապել են իրենց ընկերներին օգնություն ցուցաբերելու, սակայն չիմանալով, որ արդեն իսկ տղաները շրջափակման մեջ են, իրենք նույնպես ընկել են շրջափակման մեջ։

7-ժամյա կատաղի մարտեր մղելու հետ մեկտեղ, մի ձեռքին զենքը, մյուս ձեռքին առաջին բուժօգնության պարագաները, անտեսելով երկնքից թափվող կրակը՝ ավագ սերժանտ Նարեկը դաշտից դուրս է բերել վիրավոր զինակիցներին՝ փրկելով նրանց կյանքը։

Դժվար է այս պայծառ տղայի մասին խոսել անցյալ ժամանակով…

Ծանր ժամին նա չերերաց ու չնահանջեց և խիզախաբար մարտնչեց՝ նաև վիրավոր հրամանատարին և զինակիցներին օգնության հասնելով և կյանքեր փրկելով։

Այսպես կյանքը նվիրեց Հայրենիքին…

Հետմահու պարգևատրվել է «Մարտական ծառայություն» և «Անձնուրաց պաշտպան» մեդալներով։

ՄԵՐԻ ԳԵՎՈՐԳՅԱՆ

19 տարեկան

ք. Դիլիջան