Բրիտանական հատուկ ծառայությունները պնդում են, որ Իսրայելը խնդրի լուծման ուժային ճանապարհին կդիմի արդեն դեկտեմբերին` հավանաբար Ծննդյան տոների նախօրեին և կամ գուցե 2012 թվականի առաջին օրերին: Նրան ամենայն հավանականությամբ կաջակցի Միացյալ Նահանգները, քանի որ նախագահ Օբաման չի ուզում կորցնել հրեական ընտրազանգվածի ձայները, իսկ Լոնդոնը դեռևս ժխտում է գործողությանն իր մասնակցության հնարավորությունը` պնդելով, որ սեփական միջուկային ռումբի ստեղծման դեպքում Թեհրանը երբեք չի կիրառի այն:

Ռուսական «Իզվեստիա» թերթի տվյալներով, Տաջիկստանում տեղակայված ռուսական ռազմաբազայի բոլոր ժամկետային զինծառայողներին կփոխարինեն պայմանագրային զինծառայողներ:
Թերթը նշում է, որ ժամկետային զինծառայողները Տաջիկստանում պարբերաբար ինչ-որ միջադեպի մասնակից են դառնում և որոշակի խնդիրներ առաջացնում: Իսկ պայմանագրայինները գիտեն, թե ուր են գնում և կարող են պատասխան տալ իրենց գործողությունների համար:

Մեծ Բրիտանիայի պաշտպանության նախարարությունը հայտարարել է Գերմանիայից իր զորքերը դուրս բերելու մասին: Բրիտանացի զինծառայողների թիվը ԳԴՀ-ում շուրջ 20 000 է, քաղաքացիական աշխատողների և ընտանիքների անդամների հետ միասին` 43 000 մարդ:
Զինվորական հրամանատարությունը մտադիր է զորախումբն ամբողջությամբ դուրս բերել մինչև 2020թ., նախատեսվածից 15 տարի շուտ, ինչը թույլ կտա նվազեցնել ռազմական ծախսերը և տարեկան խնայել շուրջ 250 միլիոն ֆունտ:

Ռուսաստան կատարած այցի ընթացքում ԱՄՆ ռազմածովային ուժերի` Եվրոպայում և Աֆրիկայում քաղաքականության, ռեսուրսների և ռազմավարության հարցերով վարչության պետ ծովակալ Քեննետ Նորթոնը բանակցել է ՌԴ ռազմական նավատորմի զարգացման պլանավորման վարչության պետ գերծովակալ Վասիլի Լյաշոկի հետ:

ԱՄՆ-ը համաձայնվել է Թուրքիային փոխանցել F-16 Fighting Falcon կործանիչների ծրագրային ապահովման մեկնարկային կոդերը, ինչի արդյունքում երկիրը հնարավորություն կստանա ինքնաթիռների վրա տեղադրել սեփական մշակման լրացուցիչ սարքավորումներ և սպառազինություն:
Թուրքիան կստանա սպառազինության և ինքնաթիռի կառավարման համակարգերի համագործակցումն ապահովող ծրագրի կոդերը և կարդիականացնի 213 կործանիչ: Ինքնաթիռներից յուրաքանչյուրի վրա կատարվող աշխատանքները գնահատվում են շուրջ 5,2 միլիոն դոլար:

Ահաբեկչական կազմակերպության ներկայացուցիչը հայտարարել է, որ արաբական հեղափոխություններից ամենամեծ օգուտը քաղել են իրենք՝ տիրանալով լիբիական զենքին, սակայն չի հստակեցրել, թե ինչ քանակությամբ ինչ զինատեսակներ են հայտնվել իրենց ձեռքում:
Նա ապստամբներին կոչ է արել ոչ մի դեպքում չհանձնել զենքը, որը Լիբիայում իսլամական կարգերի հաստատման գլխավոր գրավականն է:

Երկրի զինված ուժերի գլխավոր շտաբի պետը հայտարարել է, որ առաջիկայում Իսրայելը պատերազմ կսկսի արաբական մեկ կամ մի քանի պետությունների դեմ, և հնարավոր է, որ ստիպված լինի բոլոր ճակատներում կռվելու համար մոբիլիզացնել բոլոր ուժերը: Նման հեռանկարը նա բացատրել է տարածաշրջանային անկայունությամբ, արաբական հեղափոխություններով և իրանական սպառնալիքով:
Միաժամանակ, արևմտյան լրատվամիջոցները, հիմնվելով Ֆրանսիայի հատուկ ծառայությունների ունեցած տեղեկությունների վրա, պնդում են, որ վերջին օրերին ԱՄՆ-ը Իսրայելին է փոխանցել յուրաքանչյուրը մոտ մեկ տոննա կշռող 55 ռումբ, որոնք նախատեսված են մեծ խորության ստորգետնյա բունկերների ոչնչացման համար: Ենթադրվում է, որ դրանք կօգտագործվեն Իրանին հարված հասցնելու ընթացքում: