Թուրքիայի արտաքին գործերի նախարար Ահմեդ Դավութողլուն Today’s Zaman թերթի լրագրողին պատմել է, որ այս տարվա գարնանը Թուրքիան խանգարել է Իսրայելին լիարժեք ներկայացուցչություն բացել ՆԱՏՕ-ի կենտրոնակայանում` սպառնալով կիրառել իր վետոյի իրավունքը:
Իսրայելը 1994թ. համագործակցում է ՆԱՏՕ-ի հետ դաշինքի մեջ չմտնող մերձավորարևելյան 6 պետությունների միավորող նախաձեռնության շրջանակներում:

Ամերիկյան լրատվամիջոցների տարածած տեղեկատվության համաձայն` ԱՄՆ-ը կարող է Իրանին առաջարկել կապի ուղիղ գիծ ստեղծել, որը կարող է կիրառվել երկու երկրների միջև կոնֆլիկտային իրավիճակների առաջացման դեպքում:
Սկզբում նախատեսվում է կապ հաստատել երկու պետությունների նավատորմերի միջև, այնուհետև, եթե փորձը հաջողվի, «թեժ գծի» գաղափարը կօգտագործվի այլ ոլորտներում ևս տարբեր բնույթի հարցեր լուծելու համար:

Հնդկաստանն սկսել է Ռուսաստանին վերադարձնել նախկինում մատակարարված Су-30К 18 կործանիչները: Ինքնաթիռները կարդիականացվեն մինչև Су-30КН տարբերակը, այնուհետև հավանաբար կփոխանցվեն Բելառուսի ռազմաօդային ուժերին:
1996թ. կնքված պայմանագրի համաձայն` Հնդկաստանը պետք է ստանար Су-30МКИ կործանիչներ, սակայն չկարողանալով ժամանակին կատարել ստանձնած պարտավորությունները` Ռուսաստանը պատվիրատուին հանձնել է ինքնաթիռի պարզեցված տարբերակի 18 նմուշ` պարտավորվելով հետագայում դրանք փոխարինել Су-30МКИ տարբերակով:

Իրանի պաշտպանության նախարար, բրիգադային գեներալ Ահմադ Վահիդին Մոսկվային վերստին կոչ է արել հարգել ստանձնած պարտավորությունները և Իրանին տրամադրել Ս-300 զենիթահրթիռային համակարգերը, որոնք լուրջ խոչընդոտ կդառնան ԱՄՆ-ի, ՆԱՏՕ-ի ու Իսրայելի համար` պարտադրելով երկար ժամանակով հետաձգել Իրանի վրա նախատեսված հարձակումը:
Թեհրանի հերթական կոչը հնչեց Ռումինիայում ԵվրոՀՀՊ համակարգերի տեղակայման ու Անդրկասպյան գազամուղի կառուցման վերաբերյալ Թուրքմենստանի ու Ադրբեջանի հետ Եվրոպական Միության անջատ բանակցությունների պատճառով Մոսկվայի ու Արևմուտքի հարաբերությունների հերթական սրման ժամանակ:

Մամուլի հաղորդումների համաձայն` Ադրբեջանի ներքին գործերի և ՌԴ իրավապահ մարմինների «Սահման-Վահան» անվանմամբ համատեղ զորավարժություններն ընթանում են պետական սահմանին հարակից ադրբեջանական 6 շրջաններում:
Զաքաթալայի շրջանում, տեղի բնակիչների հաղորդմամբ, անգամ պահակակետեր են տեղակայվել, ուր ներքին գործերի և ոստիկանության զինված աշխատակիցները մանրամասն ստուգում են ավտոմեքենայով շրջան մտնող և դուրս եկող բոլոր անձանց:
Շրջանի ոստիկանությունում հաստատել են այդ փաստը, սակայն գործողության գաղտնիությունը վկայակոչելով, այլ տեղեկություններ չեն հաղորդել:

Հնդկաստանի պաշտպանության նախարարությունը հայտարարել է, որ մտադիր է զբաղվել տորպեդային սպառազինության մշակման ու փորձարկման` դեռևս ԽՍՀՄ օրոք Իսիկ Կուլ լճի ափին կառուցված «Դաստան» կենտրոնի արդիականացմամբ: Խորհրդային տարիներին այստեղ իրականացվում էին ժամանակի համար եզակի ու գերարագ, ինչպես նաև միջուկային մարտագլխիկներ կրելու ունակ «Շկվալ» թևավոր ռեակտիվ տորպեդների ստորջրյա փորձարկումները:
ԽՍՀՄ փլուզումից հետո կենտրոնը մատնվել էր փաստական անգործության: Բայց թեև Կիրգիզիայում որևէ գաղտնիք գնելն առանձնապես դժվար չէր, օտարերկրյա հատուկ ծառայություններին տարիներ շարունակ չէր հաջողվում անհրաժեշտ տեղեկություններ ձեռք բերել այս հրթիռների մասին:

Այդ մասին հայտարարել է Քադաֆիի վարչակարգի ներկայացուցիչ Մուսա Իբրահիմը, նշելով, որ ճակատամարտը դեռ չի ավարտվել, իսկ իրենք ունեն պայքարը դեռ ամիսներ շարունակելու համար անհրաժեշտ զենք ու զինամթերք: Նա վերստին հավաստիացրել է, որ Քադաֆին գտնվում է Լիբիայում և լրիվությամբ ղեկավարում իրեն հավատարիմ ուժերի գործողությունները, հանդիպում մարդկանց հետ, մասնակցում բոլոր խորհրդակցություններին և տալիս համապատասխան ցուցումներ: