Մոտ ապագայում Ռուսաստանի զինված ուժերը անցում կկատարեն ռադիոկապի վեցերորդ սերնդի համակարգերին: Այդ մասին հայտնել է ՌԴ զինված ուժերի գլխավոր շտաբի պետի տեղակալ գեներալ-գնդապետ Վալերի Գերասիմովը:
Նա նաև հայտնել է, որ զորքերում տակտիկական, օպերատիվ և օպերատիվ-ռազմավարական օղակներում ավտոմատ կառավարման համակարգերի արդիականացման աշխատանքներ են տարվում:
Գեներալը նշել է, որ երկրի ռազմական արդյունաբերությունը ռադիոկապի սկզբունքորեն նոր համակարգեր է ստեղծում, և թվային տեխնոլոգիաները արդեն ներդրվում են բանակում: Դրանք առաջին անգամ կկիրառվեն «Կենտրոն-2011» զորավարժության ժամանակ:

ՌԴ պաշտպանության նախարարությունը որոշել է վերականգնել աշխարհում ամենահզոր 1144 դասի «Օրլան» ատոմային հածանավերը` դրանք վերածելով ունիվերսալ հրթիռակիր ռազմանավերի: Դրանք ունակ կլինեն ցանկացած խնդիր կատարել ծովում` ոչնչացնել ավիակիրներ, պաշտպանվել օդային հարվածներից, խոցել նաև ցամաքային թիրախներ:
Այս դասի երեք հածանավեր` «Ծովակալ Նախիմով», «Ծովակալ Լազարև» և «Կիրով», 20 տարի առաջ պահեստավորվել են նավակայաններում, և միայն «Պետրոս Մեծ» ռազմանավն է շարունակել նավարկությունը:

ԱՄՆ ռազմաօդային ուժերը առաջին անգամ փորձարկումներ են անցկացրել B-1B Lancer հեռահար ռմբակոծիչի` ծովային նշանակետերին հարվածներ հասցնելու կարողությունը ստուգելու համար:
Փորձարկումների ժամանակ Lancer-ը JDAM տեսակի տասը միավոր զինամթերք է օգտագործել` 225 կգ-անոց GBU-54 երկու ռումբ լազերային նշանառությամբ, 225 կգ-անոց ուղղորդվող GBU-38 վեց ռումբ, GBU-31 900 կգ-անոց ազատ անկման երկու ռումբ: Հարվածները հասցվել են մանևրելու բարձր ունակություններով վերջրյա նշանակետերին:
Փորձարկումների հիմնական նպատակն էր ինքնաթիռի նոր ծրագրային ապահովման աշխատանքը ստուգելը, ծովի վրա B-1B ռմբակոծիչի կիրառման տակտիկա և մեթոդներ մշակելը:

ԱՄՆ ռազմածովային ուժերը անսպասելի խնդրի առջև են կանգնել. F-18 տախտակամածային կործանիչների կոնստրուկցիաների մաշվածությունը նախատեսվածից ավելի արագ է ընթանում:
Արագացված մաշվածության պատճառն այն է, որ ինքնաթիռները սպառազինության վերցնելիս դրանց ներուժը հաշվարկվել է խաղաղ պայմաններում շահագործմանը համապատասխան: Սակայն վերջին երկու տասնամյակում ԱՄՆ-ը ակտիվ մարտական գործողություններ է վարել` կրճատելով ինքնաթիռների շահագործման ժամկետը:
Օրինակ` մոտ 10 տարի առաջ շարք մտած F-18E կործանիչի հաշվարկային ներուժը 6000 ժամ է, սակայն այժմ այն նվազեցվել է մինչև 3000 ժամ. այդքան է ինքնաթիռի թևերի կոնստրուկցիաների ծառայության ժամկետը:

Վաշինգտոնում գտնվող ավիացիայի և տիեզերանավորդության ազգային թանգարանը այցելուներին ցուցադրել է ամերիկյան KH-9 Hexagon (վեցանկյուն) լրտես-արբանյակը: Ցուցադրությունը որևէ կերպ չի գովազդվել և տևել է մեկ օր:
Ներկայացված արբանյակի վրայից հանված են եղել արևային մարտկոցները, օպտիկական և որոշ այլ սարքավորումներ, որոնք գաղտնիության տարրեր են պարունակում:

Ռուսաստանի ռազմաօդային ուժերը ավարտել են Су-34 ռազմաճակատային ռմնբակոծիչների պետական փորձարկումները: Ռազմաօդային ուժերի գլխավոր հրամանատար Ալեքսանդր Զելինը եզրափակիչ ակտում առաջարկել է ինքնաթիռները վերցնել սպառազինության:
Նախատեսվում է, որ այդ մասին կառավարությունը համապատասխան որոշում կընդունի 2012թ., այժմ մասնագետները անհրաժեշտ փաստաթղթերն են կազմում:

ՌԴ զինված ուժերի ՀՕՊ զորքերը մարտական հրաձգության ընթացքում կկրակեն С-300 համալիրի հրթիռների վրա: Ծառայության երաշխիքային ժամկետն ավարտած հրթիռները ՆԱՏՕ-ի նորագույն ինքնաթիռների և հրթիռների դեր կկատարեն:
Այդպիսով զինվորականները միանգամից երկու խնդիր կկատարեն` կոչնչացնեն հին հրթիռները և զենիթայիններին կսովորեցնեն խփել արտասահմանյան սպառազինության և տեխնիկայի նոր նմուշները: