Ռուսաստանի ռազմածովային ուժերը ստացել են մինչև 6000 մետր խորության վրա սուզվելու հնարավորություն ունեցող բնակեցվող ստորջրյա ապարատ:
«Կոնսուլ» բատիսկաֆը փորձարկվել է տարբեր տեղանքներում, այդ թվում Հյուսիսային Ատլանտիկայի ջրերում, ուր ջրանավորդները փորձարկման ծրագիրն իրականացրել են 6270 մետր խորության վրա:

Ռուսաստանի վարչապետ Վլադիմիր Պուտինը այցելել է Նիժնի Տագիլում անցկացվող սպառազինության և ռազմական տեխնիկայի միջազգային ցուցահանդես, ծանոթացել «Ուրալվագոնզավոդ» ընկերության ցուցասրահին: Նրան ներկայացվել է Т-90С ռուսական նորագույն տանկը:
Այս տանկի առավելություններից են մինչև 5 կմ հեռահարությամբ հրթիռները: Սովորական արկերը թիրախը խոցում են մինչև 2 կմ հեռավորության վրա, ինչպես, օրինակ` ամերիկյան Abrams և գերմանական Leopard տանկերը:

Իրանում վարժական թռիչքի ժամանակ երկրի ռազմաօդային ուժերի ինքնաթիռ է կործանվել: Ինքնաթիռն ընկել է Թավրիզ քաղաքից ոչ հեռու, ուր ռազմաօդային ուժերը զորավարժություններ են անցկացնում:
Վթարի հետևանքով զոհեր չեն եղել, օդաչուն ինքնանետվել է և փրկվել: Թռիչքային տեխնիկայի մասին տվյալներ չեն հաղորդվում:

ԱՄՆ-ը ավարտել է M1A1 Abrams տանկերի մատակարարումը Աֆղանստանին: 140 տանկերի մատակարարման գործարքը ռազմական գերատեսչության հավանությանն է արժանացել 2008թ.: Մասնագետների գնահատմամբ, այդ երկիրը ստացել է ամերիկյան տանկերի ամենաժամանակակից մոդիֆիկացիան:

Ռուսաստանի պաշտպանության նախարարությունում մտադիր են մշակել արտաքին ներգործության հանդեպ բարձր կայունությամբ զինամթերքներ:
Նոր զինամթերքները կպայթեն միայն սեփական պայթուցիչների գործարկումից, կդիմանան բարձրությունից ընկնելուն, բեկորային վնասվածքներին, հրդեհին: Դրանց լայն կիրառումը կարող է սկսվել արդեն 2015թ.` կախված ֆինանսավորման ծավալից:

Նիժնի Տագիլում անցկացվող սպառազինության և ռազմական տեխնիկայի 8-րդ միջազգային ցուցահանդեսում ներկայացվել է տանկերի աջակցման «Տերմինատոր» մարտական մեքենան:
«Տերմինատոր»-ը Т-90С տանկի բազայի վրա ստեղծված բազմանպատակ մարտական մեքենա է: Նախատեսված է հակառակորդի` հակատանկային նռնականետներով, հրթիռային համալիրներով, ինչպես նաև հրաձգային զենքով զինված կենդանի ուժի ոչնչացման համար:

Ներկայումս ՆԱՍԱ-ն տիեզերանավորդների խիստ պակաս է զգում: Այդ տեսակետն է արտահայտված ԱՄՆ Ազգային հետազոտական խորհրդի (տիեզերքի և գիտության հարցերով կառավարությանը խորհրդատվական ծառայություններ մատուցող պետական կառույց) հանձնաժողովի ներկայացրած զեկույցում:
2000թ. հետո ամերիկյան տիեզերանավորդների թիվը կրճատվել է` 150-ից հասնելով մինչև 61 մարդու: Թեև «Շաթլ» տիեզերանավերի թռիչքային ծրագիրը դադարեցվել է, տիեզերանավորդների նման կրճատումը համարվում է չափազանցված: