ՌԴ տիեզերական զորքերում պատրաստվում են մարտական հերթապահության ընդունել «Վորոնեժ-Մ» ռադիոտեղորոշիչ կայանը:
«Վորոնեժ-Մ-ը» նախատեսված է հրթիռային հարձակման մասին նախազգուշացման համակարգի շրջանակներում տիեզերական տարածքի հսկողության համար` թիրախի հեռահար հայտնաբերման հնարավորությամբ (4500-6000 կմ):

RQ-4 Global Hawk անօդաչու ապարատը կփոխարինի 1957թ. ԱՄՆ ռազմաօդային ուժերի սպառազինությունում կանգնած U-2 Dragon Lady հետախուզական ինքնաթիռներին: Այժմ Global Hawk-ը մարտական կիրառման փորձարկումներ է անցնում:
Անօդաչուի մշակումն իրականացվում է 2000թ.: Ծրագրի ընդհանուր արժեքը 12 միլիարդ դոլար է: Այդ միջոցներով զինվորականները նախատեսում են ավարտել բոլոր փորձարկումները և սպառազինության վերցնել 55 անօդաչու ապարատ:

ՌԴ Բալթյան նավատորմը համալրվում է Ս-400 Տրիումֆ ՀՕՊ համակարգերով:
Ս-400-ը նախատեսված է բոլոր տեսակի թռչող ապարատների խոցման համար: Իր արդյունավետությամբ կարող է փոխարինել Ս-300 տիպի 3 համակարգի: Միաժամանակ ուղեկցում է 300 թիրախ` հրթիռներով խոցելով 36-ը:
Մինչև տարեվերջ Բալթյան նավատորմը կստանա Ս-400 ՀՕՊ համակարգի 2 մարտկոց:

ՌԴ պաշտպանության նախարարությունը հանել է ՄԻԳ-29Կ/ԿՈՒԲ ինքնաթիռների թռիչքի համար հայտարարված արգելքը, որը մտցվել էր հունիսի 23-ին այդպիսի ինքնաթիռի կործանումից հետո:
Հատուկ հանձնաժողովը պարզել է վթարի պատճառները և ձեռնամուխ եղել դրանց վերացմանը:
Օրերս էլ «ՄԻԳ» ընկերության ներկայացուցիչները հայտարարել են, որ Ռուսաստանի զինված ուժերը գնելու են 24 միավոր ՄԻԳ-29Կ/ԿՈՒԲ տախտակամածային կործանիչներ, պայմանագիրը հավանաբար կստորագրվի ՄԱՔՍ-2011 ավիասալոնի ընթացքում:

Մինչև տարեվերջ Նովոսիբիրսկի` Չկալովի անվան ավիացիոն արտադրական միավորումը Ռուսաստանի ռազմաօդային ուժերին կփոխանցի 6 ՍՈՒ-34 ճակատային ռմբակոծիչ:
Այդ դասի ինքնաթիռների թիվը ՌԴ զինված ուժերում նոր նմուշների հետ միասին կկազմի 16 միավոր: Նախատեսվում է մինչև 2015թ. սպառազինության վերցրած ռմբակոծիչների թիվը հասցնել 70-ի:

«Ռեյնմետալ» ընկերությունը մշակել է դիպուկահարների հայտնաբերման ASLS ակուստիկ նոր համակարգ:
Վերլուծությունների էլեկտրոնային սխեմաների և էկրանի հետ համակցված ալեհավաքն ու միկրոֆոնները տեղադրվում են զրահամեքենայի ներսում: Հակառակորդի դիպուկահարի կրակոցի ժամանակ համակարգը ակուստիկ և տեսողական եղանակներով տեղեկացնում է անձնակազմին, էկրանի վրա արտացոլում հայտնաբերման գործընթացը:

Մոսկվայի` պարաշյուտների պատրաստման գիտահետազոտական ինստիտուտի մասնագետները օդադեսանտային զորքերի համար նախատեսված «Լիստիկ» նոր պարաշյուտ են ստեղծել:
Գիտահետազոտական ինստիտուտի գլխավոր տնօրենի տեղակալ Յուրի Նազարենկոն հայտնել է, որ «Լիստիկն» արդեն փորձարկում են հմուտ պարաշյուտիստները: