2005-2007 թվականներին Ուկրաինայի պաշտպանության նախարար Անատոլի Գրիցենկոն, որն այժմ գլխավորում է խորհրդարանի անվտանգության ու պաշտպանության հարցերի հանձնաժողովը, երկրի նախագահին մեղադրել է անցած երկու տարիներին Ուկրաինայի անվտանգության ու պաշտպանության վերաբերյալ ոչ մի հիմնարար փաստաթուղթ չհաստատելու համար, ինչի հետևանքով էլ 2010-2011 թվականները պետք է երկրի զինված ուժերի համար կորած տարիներ համարել:

Իսրայելի նախագահ Շիմոն Պերեսը հայտարարել է, որ երկրի կառավարությունը նախընտրում է Իրանի միջուկային ծրագրերի հետ կապված խնդիրը լուծել ուժային ճանապարհով: Նա ասել է, որ տարբեր երկրների հատուկ ծառայությունները գնալով ավելի հաճախ են զգուշացնում, որ երկու տարի անց Իրանը արդեն միջուկային զենք կունենա, իսկ ՄԱԳԱՏԵ-ն պնդում է, որ Իրանում արդեն ընթանում են միջուկային մարտագլխիկի համակարգչային մոդելավորման աշխատանքները: Համարվում է, որ այս զեկույցը կարող է շրջադարձային լինել Իրանի նկատմամբ Արևմուտքի որդեգրած քաղաքականության համար: Պաշտոնական Թեհրանն այս զեկույցն արդեն որակել է «կեղծ ու շինծու»:

ԱՄՆ զինված ուժերի գեներալ Պիտեր Ֆուլլերը Աֆղանստանում գտնվող ամերիկյան զորախմբի հրամանատարի տեղակալի պաշտոնից իսկույն հեռացվել է միայն այն բանի համար, որ Աֆղանստանի ղեկավարությանը հրապարակավ անվանել է «անշնորհակալ, անկանխատեսելի ու իրականությունից կտրված» և հայտարարել, որ նրանք չեն հասկանում, թե իրենց երկրի պատճառով որքան զրկանքներ է կրում Միացյալ Նահանգները: Գեներալի քննադատության համար առիթ էր դարձել նախագահ Քարզայի այն հայտարարությունը, թե ԱՄՆ-Պակիստան զինված բախման դեպքում Աֆղանստանը կպաշտպանի Պակիստանին:

Դամասկոսն ԱՄՆ-ին մեղադրում է ոչ միայն Սիրիայի ներքին գործերին կոպիտ միջամտելու, այլև ահաբեկիչներին ֆինանսավորելու համար: Նախօրեին, երբ Սիրիայի իշխանությունները, պահպանելով Արաբական պետությունների լիգայի հետ ձեռք բերված համաձայնությունը, ազատ արձակեցին զինված բախումներին անմիջականորեն չմասնակցած 550 քաղբանտարկյալի և ընդդիմությանը կոչ արեցին մեկ շաբաթվա ընթացքում հանձնել զենքը, ԱՄՆ պետդեպարտամենտի պաշտոնական ներկայացուցիչը սիրիական ընդիմությանը հրապարակավ կոչ արեց… շարունակել զինված պայքարը:

Թեև 2011 թվականի ապրիլին ԱՄՆ ռազմաօդային ուժերի հրամանատարությունը ժխտեց Լիբիայի ռմբահարումների ժամանակ ոչ հարստացված ուրան պարունակող ռումբերի կիրառման մասին լուրերը, սակայն հրաժարվեց մեկնաբանել այդպիսիք հետագայում օգտագործելու հավանականությունը: Իսկ այժմ, Քադաֆիի նախկին նստավայր Բաբ-Ալ-Ազիզիից, Սիրտից ու մի քանի այլ բնակավայրերից անկախ գիտնականների ու փորձագետների վերցրած նմուշների լաբորատոր փորձաքննությունն աներկաբայորեն վկայում է նրանցում ուրանի բավական մեծ պարունակության մասին:

Իսրայելի բոլոր բանկերը պայմանագրային հարաբերություններ ունեն ժամկետային զինծառայողների սպառողական միության հետ, որին անդամակցելը զինծառայողին զորակոչվելու պահից սկսած թույլ է տալիս երկրի ողջ տարածքում տասնյակ խանութների ցանցում օգտվել զեղչերի ու արտոնությունների համակարգից:
Ընդ որում, պարտադիր չէ անգամ միությանն անդամակցելը: Իսրայելյան բանկերը, դիմելով «ռիսկային վարկավորման», ընդառաջ են գնում յուրաքանչյուր, նույնիսկ նվազագույն դրամական բավարարում ստացող շարքային զինծառայողի: Իսկ եթե վերջինս ունի աշխատող ծնողներ, վարկային արտոնությունների չափը, բնականաբար, մեծանում է:

Երկրի պաշտպանության նախարարությունը հաղորդել է, որ երկկողմ ռազմական համագործակցության շրջանակներում այդ նպատակով արդեն Բիշկեկ է ժամանել 12 հրահանգիչ: Մինչև դեկտեմբերի 19-ը նախատեսված դասընթացների ընթացքում նրանք ղրղըզ զինծառայողներին կուսուցանեն քաղաքային պայմաններում մարտական գործողություններ վարելու, պատանդների ազատման և խոշոր ստորաբաժանումների շրջանում փոքր խմբերով գործելու գաղտնիքները: