Իսրայելական բանակում հաջողությամբ փորձարկվել է Մ339 «Կալանիտ» հրետանային արկը: Մասնագետների կարծիքով «տանկեր ոչնչացնողների» դեմ պայքարի համար նախատեսված այս արկը բացառիկ հատկություններ ունի և տարբերվում է այսօր արտադրվող բոլոր օրինակներից:
Այն ստեղծելիս հաշվի են առել 2006 և 2008թթ. ռազմական գործողությունների ժամանակ Իսրայելի բանակի զրահատանկային ստորաբաժանումների ձեռք բերած մարտական փորձը:

ԱՄՆ-ում հետազոտություններ են անցկացվում միջատանման անօդաչու թռչող սարքեր ստեղծելու նպատակով:Նախագծվող ապարատները կրկնօրինակելու են ցեցի, մոծակի և այլ միջատների թռիչքի առանձնահատկություները, ունենալու են նման կառուցվածք և փոքր չափսեր:
ԱՄՆ պաշտպանության նախարարությունը ռազմական բյուջեի նախագծում ներառել է 5 միլիարդ դոլար այդ ոլորտում աշխատանքներն ակտիվացնելու համար:

Ամերիկյան Lockheed Martin ընկերությունը F-35C ինքնաթիռի (նավի վրա տեղակայվող տարբերակի) և գազահեռացնող վահանակի փորձարկումներ է անցկացնում ավիակրի սարքավորումների վրա ինքնաթիռի շարժիչների ռեակտիվ ալիքի ազդեցության աստիճանը որոշելու նպատակով:
Գազահեռացնող վահանակը շեղում է շարժիչներից դուրս եկող գազերի ալիքը, կանխարգելում է թռիչքի սպասող մյուս ինքնաթիռների վնասումը, պաշտպանում է սպասարկող անձնակազմին:

Գերմանիայի մահմեդական կազմակերպությունների ներկայացուցիչները առաջարկել են բունդեսվերում զինվորական իմամների հաստիք սահմանել մահմեդականություն դավանող զինծառայողներին հոգևոր աջակցություն տրամադրելու նպատակով:
Այժմ Գերմանիայի զինված ուժերում ծառայում են մոտ 90 կաթոլիկ և բողոքական հոգևորականներ: Իսլամական կազմակերպությունների անդամների կարծիքով մուսուլման զինվորների թիվը անշեղորեն աճելու է, և իմամների գործունեությունը նպաստելու է տարբեր դավանանքի զինծառայողների միջև ծագած կրոնական խնդիրների լուծմանը:
Որոշ աղբյուրների համաձայն գերմանիայի զինված ուժերում ծառայում են ավելի քան 1200 մուսուլմաններ, սակայն հստակ տվյալներ չունի նաև երկրի պաշտպանության նախարարությունը, քանի որ ծառայության անցնելիս դավանանքի վերաբերյալ պարտադիր հարցում չի արվում:

Ամերիկյան նոր ապարատի շնորհիվ զինծառայողները կկարողանան որոշել, արդյո՟ք մինչև 100 մ հեռավորության վրա գտնվող կոնկրետ մարդու մոտ զենք և պայթուցիկ կա:
Ամերիկյան ռազմական գերատեսչության պատվերով ստեղծվող CounterBomber ապարատը հավանաբար զորքեր կհասնի 2014թ.: Այն իրենից ներկայացնում է եռոտանու վրա տեղադրված սարքավորումների համակարգ: Սովորական և ինֆրակարմիր ճառագայթներով տեսախցիկները ավտոմատ «որսում են» մոտեցող մարդուն, ապա ռադարի փոխանցած տվյալները վերլուծում է համակարգիչը:

Չինաստանի բանակի գլխավոր շտաբի պետ Չեն Բինդեն հայտարարել է, որ իրենք «Դունֆեն-21Դ» («Արևելյան քամի») հրթիռ են ստեղծում:
Նրա խոսքերով, հրթիռը մշակման և փորձարկման փուլում է, և առայժմ վաղ է խոսել դրա մարտական կարողությունների մասին, նաև հավելել է, որ սպառազինության ընդունելուց հետո այն պաշտպանական նպատակներով է օգտագործվելու:

Սաչխերիայի ռազմական լեռնաուսումնական կենտրոնին շնորհվել է Հյուսիսատլանտյան դաշինքի չափանիշներին համապատասխանության հավաստագիր: Ուսումնական կենտրոնի հրահանգիչները, որոնց երեք տարի ուսուցանում էին ֆրանսիացիները, այժմ կարող են կազմակերպել դաշինքի անդամ պետությունների զինծառայողների ուսուցումը: