Առաջիկա 5 տարիներին բանակը կստանա ռազմավարական նշանակության 3 անգամ շատ «Տոպոլ-Մ», «Յարս» և «Ավանգարդ» հրթիռներ, ռազմավարական նշանակության սուզանավերի համար` 1.5 անգամ շատ «Բուլավա» և «Սինեվա» հրթիռներ, քառապատիկ շատ ինքնաթիռներ, 5 անգամ շատ ուղղաթիռներ, 2.5 անգամ շատ ՀՕՊ համակարգեր:

ՌԴ պաշտպանության նախարար Անատոլի Սերդյուկովը հայտարարել է, որ պաշտպանության նախարարությունն այլևս մտադիր չէ գնել հայրենական արտադրության տանկեր, քանի դեռ դրանք չեն համապատասխանի ժամանակակից չափանիշներին:

Վերջին շրջանում լուրջ քննարկումների առարկա է դարձել ՌԴ զինված ուժերի կողմից տանկերի և ինքնաթիռների փչովի մակետներ ձեռք բերելու խնդիրը, որի նպատակահարմարությունն ու անհրաժեշտությունը սակայն, լրջորեն վիճարկում են բազմաթիվ փորձագետներ:

«Le Figaro»-ն հաղորդում է, որ Ֆրանսիան գաղտնի, առանց տեղյակ պահելու դաշնակիցներին, զենք է մատակարարում Տրիպոլիից հարավ գտնվող լեռներում բնակվող բերբերյան ցեղերին, որոնք պայքարում են Քադաֆիի ռեժիմի դեմ: Ֆրանսիական ռազմաօդային ուժերը Նաֆուսի լեռներում հատուկ պատրաստված հրապարակներում անկարգելների (պարաշյուտների) միջոցով նետում են նռնականետներ, հակատանկային կառավարվող հրթիռներ, գնդացիրներ և ինքնաձիգներ, որոնց շնորհիվ ապստամբները հասել են նկատելի հաջողությունների:

«Եթե Իրանը ատոմային զենք արտադրի, Սաուդյան Արաբիան նույնպես քայլեր կձեռնարկի ատոմայն զենք ձեռք բերելու ուղղությամբ»,- հայտարարել է Սաուդյան Արաբիայի արքայազն Թուրքի ալ Ֆեյսալը:
Նախկինում արևմտյան մամուլում տեղեկություններ են հայտնվել, որ արաբական այդ երկիրը ատոմային սպառազինություն գնելու հնարավորության վերաբերյալ գաղտնի բանակցություն է վարել Պակիստանի հետ, և վերջինս համաձայնել է մերձավոր Արևելքում իրավիճակի կտրուկ սրվելու պարագայում նման զենք մատակարարել:

ԱՄՆ պաշտպանության նախարարի պաշտոնից հեռացել է Ռոբերտ Գեյթսը, որը ղեկավարում էր պաշտպանական գերատեսչությունը 2006թ.-ից: Հրաժեշտի արարողության ժամանակ ԱՄՆ նախագահ Բարաք Օբաման թոշակի անցնող Գեյթսին հանձնել է Ազատության նախագահական մեդալ` Ամերիկայի` քաղաքացիական անձանց համար նախատեսված բարձրագույն պարգևը:
Պաշտպանության նոր նախարար է նշանակվել Լեոն Պանետտան` կենտրոնական հետախուզական վարչության նախկին ղեկավարը:

Ռուսաստանի պաշտպանության նախարարության գնահատմամբ, ծովային տեղակայման «Բուլավա» միջմայրցամաքային բալիստիկ հրթիռը պատրաստ է սերիական արտադրության: Նման կարծիք հնչել է «Յուրի Դոլգորուկի» ատոմային սուզանավից օրերս կատարված հաջող փորձարկումից հետո:
Մինչ այժմ կատարվել է հրթիռի 15 փորձարկում, որից 8-ը` հաջողված: Մինչև տարեվերջ նախատեսվում է ևս 4 փորձարկում անցկացնել, որոնց լիակատար հաջողվածության դեպքում հրթիռը սպառազինության կվերցվի 2011թ.: