Նորություններ
ԱՄՆ-ի մի խումբ նախկին դիվանագետներ և ռազմական գործիչներ` Ջորջ Շուլցը (ԱՄՆ պետքարտուղար 1982-1989թթ.), Ոիլյամ Փերրին (ԱՄՆ պաշտպանության նախարար 1994-1997թթ.), Հենրի Քիսինջերը (ԱՄՆ պետքարտուղար 1973-1977թթ.) և Սեմ Նանը (Զինված ուժերի գծով Սենատի հանձնաժողովի նախկին նախագահ) «The Wall Street Journal» թերթում հանդես են եկել հոդվածով, որում կոչ են անում գիտակցել համաշխարհային անվտանգության դեմ ուղղված սպառնալիքների լրջությունը:
ԱՄՆ-ը, Ճապոնիան և Ասիական-խաղաղօվկիանոսյան տարածաշրջանի այլ երկրներ մտահոգվել են Չինաստանի ռազմական բյուջեի աճով (այն այս տարի կկազմի 12.7%, բացարձակ մեծությամբ` 91.7 մլրդ դոլար):
Ճապոնիայի արտաքին գործերի նախարար Սեիջի Մաեհարան մարտի 4-ին հայտարարեց, որ վերոնշյալը «չափազանց շատ է պաշտպանական ծախսերի համար»: Փորձագետներից շատերն այն կարծիքին են, որ Չինաստանի ռազմական բյուջեի հրապարակված մեծությունը շատ ավելի քիչ է, քան իրականը:
Կանխատեսումների համաձայն` 20 տարի հետո Ասիան կվերածվի ինքնաթիռների ամենամեծ շուկայի, որի ծավալը կկազմի համաշխարհային շուկայի մեկ երրորդը: Հաջորդ 15 տարվա ընթացքում ինքնաթիռափոխադրումների ծավալն ամբողջ աշխարհում կկրկնապատկվի, իսկ Ասիական-խաղաղօվկիանոսյան տարածաշրջանն այդ առումով կգերազանցի Հյուսիսային Ամերիկային ու Եվրոպային: Ակնկալվում է, որ Ասիական տարածաշրջան կմատակարարվի ավելի քան 8500 նոր ինքնաթիռ` 1.2 տրլն դոլար ընդհանուր արժողությամբ:
Ֆրանսիական «Le Monde»-ը գրում է, որ Մերձավոր Արևելքում բռնկված հեղափոխությունների ալիքը անհանգստացրել է Ֆրանսիայի ռազմարդյունաբերական ընկերություններին, քանի որ Մերձավոր Արևելքի երկրները ֆրանսիական ռազմական արտադրանքի հիմնական գնորդն էին:
Փորձագետների կարծիքով, պայմանագրերի մեծ մասը կվերանայվեն, հնարավոր է՝ նույնիսկ չեղյալ հայտարարվեն: Ֆրանսիացի ռազմարդյունաբերողներն «աղոթում են», որ հեղափոխությունը չհասնի գոնե Սաուդյան Արաբիա, որին բաժին է ընկնում տարածաշրջան մատակարարվող ֆրանսիական արտադրանքի 75%-ը:
54-ամյա ավստրիացի Հարալդ Ալոյիսը դատապարտվել է մեկ տարվա ազատազրկման` հօգուտ Ռուսաստանի լրտեսություն անելու համար: Լինելով ուղղաթիռներ արտադրող «Eurocopter» ընկերության ինժեներ` նա Ռուսաստանի հատուկ ծառայություններին 1997-2002թթ. տրամադրել է ռազմական և քաղաքացիական ուղղաթիռների վերաբերյալ տեղեկատու նյութեր և փաստաթղթեր: Դատարանի վճռում նշվում է, որ Ռուսաստանի նպատակն է եղել տեղեկություն ստանալը հատկապես «Tiger» գրոհային ուղղաթիռի վերաբերյալ:
